Delhi, 4 February : Olympian Esha Singh Asian Rifle aru Pistol Championship laga opening day te Delhi laga Dr. Karni Singh Shooting Range ot women’s individual 10m air pistol final te gold medal jitise. 21 umar Esha final te ahikene 239.8 score kori gold paise, aru itu tai laga second individual senior Asian Championship gold hoi ase.
Tai Chinese Taipei laga duita shooter logot dangor competition face korise — Cheng Yen-Ching, juntu 235.4 score loi silver paise, aru Yu Ai-Wen, juntu 217.7 score loi bronze jitise.
Esha Singh, Olympic medallist Manu Bhaker, aru Suruchi Singh — itu tinijon milikene Women’s Team 10m air pistol event te bhi gold medal jitise. Tinijonor combined total score 1,726 asil. Itu event te Vietnam silver paise aru Chinese Taipei bronze jitise.
Aru alag side te, world champion Samrat Rana Men’s individual 10m air pistol final te bronze medal loi satisfied thakibo loga hoise.
Add Comment