Guwahati, January 5 : Commercial(passenger aro saman khan bukha) gari laga malik khan para pura rajya te 48 ghonta lamba strike rakhibo koikina kuwa tu etya komaikina 24 ghonta kuridisey. Etu logotey, bus, truck khan nisna commercial gari khan tu Saturday(January 6) laga phujur 5am fale para chola suru hobole asey.
Etu faisla tu Assam Motor Worker Association laga leader khan para Friday din te state transport department logotey baat chit kora picheyte ahisey. Reports hisap te, transport department laga official aro motor workers’ association leader khan laga majotey 5 ghonta lamba discussion chulisey aro etu picheyte 48 ghonta lamba strike tu 24 ghonta te komaidibole laga faisla loisey.
Etu association para strike laga homoi tu 24 ghonta para komabole faisla kurisey. Transport department para motor workers association ke etu biswas bi dilaisey ki sarkar para etu mamla te action lobo.
Etu strike para office ja manu khan ke eman diktar te dhalidisey kunkhan tu taikhan laga kaam kora jaga khan te pungchibole dukh dukh paisey. Kilemaney strike nimitey bus, taxi aro app para booking kora taxi khan nochola hoisey. Pura din, manu khan para aha juwa kuribole diktar paisey, khas kurikina Guwahati nisna dangor seher te.
Thursday din te, Assam laga seher khan te petrol pump khan te lamba line dikhibo parisey kilemaney manu khan tu fuel laga supply komti hoijabole laga bhoi para taikhan laga fuel tanky bhorabole nimitey line hoikina khara kuri thakisey.
Etu strike tu Bharatiya Nyaya Sanhita (BNS) para Indian Penal Code (IPC) ke replace kuribole thaka nimitey kora laga asey. Nutun kanoon hisap te, driver khan tu taikhan laga laparwahi nimitey serious accident kora aro police ke etu ghotna khan report nukurisey koiley 10 saal jail hobo parey nohoilebi Rs 7 lakh laga fine terabo parey.
Add Comment