Guwahati, October 29 : Officials khan para Saturday din te koisey ki Assam laga Karimganj district te ekjun 47 years laga poila laga panchayat member aro BJP leader kun juwa olop din para haraikina thakisey etu manu tu murikina thaka paisey.
Police para tailaga dead body tu Friday rati te Karimganj district laga Patharkandi area para paisey. Etu BJP leader laga naam tu Abdul Sattar thakisey.
Abdul Sattar kun ekta local Bharatiya Janata Party (BJP) neta thakisey tai tu October 23 para haraikina thakisey. Police para etu manu tu hatsa laga sikar hoisey koikina identify kurisey.
Karimganj district laga Superintendent of Police Partha Pratim Das para koisey ki etu mamla te ekta murder case file kurisey.
Abdul Sattar laga gao te bisi jokhom kha laga dagi khan thakisey kuntu para dikhai asey ki tai ke bi torture kurisey.
Tailaga parivar para bi tailaga murder hoisey koikina koi asey.
Abdul Sattar laga parivar khan para iljam lagaikina koi asey ki ekjun local Congess leader Surman Ali aro tailaga parivar khan murder kora te shamil thakisey.
Hoilebi police para koisey ki taikhan para etya bi etu mamla te sai asey.
Sattar laga rishtadar khan para kuwa hisap te, October 23 te tai ghor te thaka homoitey rati 9 pm fale tai para bisi phone call receive kurisey.
Tai para tailaga parivar ke koisey ki tai tu ekjun local MLA laga ghor te ekta jaruri meeting attend kuribole jai asey.
Ekjun family member para yaad kurikina koisey, “Tai wapas ahanai, aro jitya amikhan para next morning te taikey contact kuribole kosis kurisey tailaga phone tu off thakisey. Amikhan para police aro BJP party laga dusra leader khan ke jankari disey.”
Sattar laga chokra para reporter khan ke kosiey ki local congress leader laga ekta leader para 4 moina ageyte tailaga baba ke dhomki disey.
Sattar laga relative khan para kuwa hisap te, tailaga haath aro theng tu bandikina thakisey aro tailaga body tu bosta bhitor te thakisey.
Tai ke moraidikina tailaga dead body ke dangor pathor logotey nudi te felai disey.
Tailaga deadbody ke autopsy karney pathaisiley aro police khan tu etu autopsy report karney rukhi asey.
Ekjun police officer para koisey, “Etu manu laga haath aro theng tu bandikina thakisey. Tailaga forehead te bisi dangor johom laga nishan thakisey hoilebi amikhan para post-mortem report napa tak tu eman jankari dibo naparey.”
Patharkandi laga ekjun BJP MLA, Krishnendu Paul para etu mamla te uccha level laga investigation kuribole koisey.
Tai para enaka koisey, “ Ekjun hodai dikhi thaka manu achanak para haraija aro tailaga deadbody ke enaka halat te pa para dikhai asey ki etu tu ekta murder thakisey. Amikhan tu police para mujrim ke identify kora picheyte taikhan ke logalog arrest kuribole demand kuri asey.
Add Comment