Assam border te 4 Mizoram gari hamla korishe

GUWAHATI: Border jamila thaka samai, komti hoilebi 4 Mizoram trucks essential items loikena jowa samai South Assam Cachar district laga holai police station pithor Bhaga Bazar laga local manuh khan para Friday rathi te hamla korishe koishe. Khobor para janaishe ke, etu local manuh khan para trucks aro food items toh sob beya kori thishe. Khobor para aro janaishe ke, etu samai police khan jaga te ahikena ase aro halat toh control korishe. Etu incident toh ek din he thaka beche Assam aro Mizoram majot te border jamila toh kotom koriboli kotha koikena thaka beche howa ase. Assam aro Mizoram laga home ministry aro chief ministers para inter-state border te jamila toh kotom koriboli fesla korishe aro besi saal para border jamila toh kotha koribo koikena fesla loikena thaka beche ase, etu kotha toh Thursday din tuita(2) states para join statement te janaikena ase. Assam para aro Mizoram oper te government advisory thikena thaka toh hataishe koishe. Konuba local organizations para rasta bondh korikena ase, etu nemite Mizoram para protest kora te Mizoram laga gari saman thurikena thaka toh rasta bondh nemite kara korikena ase koishe. Etu tuita(2) states pithor te border jamila nemite July 26 darik te besi tangor larai hoikena 6 Assam Police personnel aro civilian 1 jun morishe aro etu samai dosura 50 manuh be jokom hoishe. Thursday din tuita(2) states para be kotha koriboli manishe aro Centre laga kotha hesab te jamila kotom koriboli koikena ase.