Agencies: Wednesday din te Chief Executive Member (CEM) Gold Cup 2019 toh kick off kurishe. Etu program kick off kura toh Karbi-Anglong Sports Association (KASA) laga notun bana stadium te kurishe.
Tuesday din te KASA president Tuliram Ronghang para press conference kora samay te football tournament laga khobor janaishe. KASA president Tuliram Ronghang toh Karbi Anglong Autonomous Council (KAAC) laga Chief Executive Member (CEM) bhi ase. Tai koishe ami khan etu din dekhibole bishi duk paishe.
Poila laga din jaad kuri kena CEM Ronghang koishe poila din khan te rati te ground toh ujala kuribole nimite ami khan Nagoan para halogen lights khan hire kuri kena bamboo poles te bandi thakishe. Agi ami khan matches khan toh international standards para rakhibole kosis kuri ase.
Tai para aro koishe ami khan toh desh laga ekdam naam thaka football clubs khan ke bhi invite kurishe. Etu te Mohan Bagan aro Goa FC ase. Aro pura Northeast laga teams khan ke bhi invite kurishe. Bordoloi Trophy toh etiya bhi national level tournament ase. Hoile bhi etiya ami khan toh CEM Gold Cup toh international level te rakhibole kosis kuri ase. Opening match toh Daimalu Sports Club aro Assam Rifles, Shillong majote hubole ase.
CEM Gold Cup laga champions khan toh ghor te wapas trophy aro Rs 2 lakh loi jabo aro runners-up toh trophy aro Rs 1 lakh pabo.
KAAC CEM para sob ke cooperation extend kurishe aro etu football tournament toh grand success kuribole modot kuribole koishe.
Add Comment