Guwahati, January 29 : Assam laga Chief Minister Himanta Biswa Sarma para Myanmar te thaka ULFA-I camp te Assam laga police para jasoos pathaisey koikina iljam laga tu hosa nohoi koisey.
Assam laga CM Himanta Biswa laga etu statement tu ekjun manu laga video ‘confession’ release huwa picheyte ahisey, kun para dawa kurisey ki taikey Assam police para ULFA-I ke jasoos kuribole pathaisey.
Etu video te thaka manu laga naam tu Manash Borgohain (alag naam Mukut Axom) thakisey, tai para confess kurisey ki taikey Assam Police para ULFA-I ke najar rakhibole pathaisey.
Manash Borgohain para koisey ki tai tu 2021 para Assam Police laga special Branch (SB) logotey kaam kuri asey.
Hoilebi, etu kotha khan ke reject kurikina Assam laga CM Himanta Biswa Sarma para koisey ki Manash Borgohain tu kitya bi rajya laga police force laga hisa thakanai.
CM Himanta Biswa Sarma para koisey, “Manash Borgohain tu Assam police department laga hisa nohoi.”
Tai tu diploma engineer asey aro Paresh Baruah tu galat jankari paikina thakibo koisey.
Etu majotey, Assam police para bi Myanmar laga ULFA-I camp te jasoos pathaisey kuwa tu hosa nohoi koisey.
