Guwahati, December 17 : 2024 te hobole thaka Indian general election nimitey Assam Congress para ekta lamba training program launch kurisey kuntu laga naam tu ‘Atut Bandhan’ asey. Etu ke Goroimari Block Congress Committee para organize kurisey aro etu laga maksat tu Booth Level Assistants (BLA) aro Booth President khan laga hosla barabole laga asey aro etu committee thaka jaga bhitor para alag alag jaga para etu training programme te bhak lobole thaka manu khan olaisey.
Etu training program tu Sunday din te, Goroimari Rajiv Bhawan laga compound te hoisey aro etu program te dangor Congress neta khan jaiseki Chaygaon laga MLA, Rekibuddin Ahmed, AICC General Secretary Prithviraj Prabhakar Sathe, A K Rashid Alom, MLA EAST Goalpara, MLA Golakganj Abdus Sobahun Ali Sarkar, Former(poila laga) MLA Ghanashyam Das, APCC Nripen Thakuria laga Vice President, Juber Alom, Yuva Congress Committee laga President aro APCC laga SC Department laga Chairperson khan thakisey.
Goroimari Block Congress Committee laga Organisation Secretary, Abdur Razzaq para etu meeting laga maksat tu janaisey aro ahibole thaka election nimitey grass-root level para tayari kuribole laga jarurat tu samjhaisey.
Jama huwa public khan ke kotha kurikina, AICC General Secretary Prithviraj Prabhakar Sathe para zameen laga kaam ekdam bhal para kuribole laga jarurat janaisey. Tai para koisey, “ Etu tu ahibole thaka Indian general election nimitey grassroot level para tayari kora laga asey. Ahibole homoitey, amikhan para 2024 laga saal te BJP laga khilaf te larayi kuribole asey.”
Sathe para bisi alag alag institution khan te, BJP para chola sarkar para influence kora opor te chinta jataisey aro koisey, “ Media, Court aro Election Commission khan bi BJP sarkar para influence huwa nisna asey. Aji kali, judi kunba para BJP sarkar laga khilaf te kotha korey, taikhan ke desh laga khilaf te ja manu asey koikina iljam lagai.”
Tai para etu koikina BJP sarkar ke bhangabole koisey ki BJP logotey jurikina thaka RSS para dhorom ke bhak kuridikina shanty nathaka laga mohol banaidisey. Sathe para jaruri saman khan laga daam utha aro jawan manu khan majotey naukri napa laga problem barithaka laga mamla ke bi criticize kurisey.
APCC laga SC Department laga Chairman Krishna Das para bu Sathe laga kotha ke dohraikina koisey ki BJP laga RSS para community khan laga majotey namila laga bhabna olaidisey.
Congress party laga poila te MP thaka Dwijen Sharma para poisa lenden laga chinta janaisey aro koisey ki rajya laga sarkar logotey poisa nai hoisey aro public khan ke dhar laga bojh bukhibole diya laga iljam lagaisey. Aro koisey ki rajya laga sarkar para poisa laga diktar te solution anibole laga tarika tu jaruri saman khan laga tax uthaikina asey.
Congress MLA Rekibuddin Ahmed para party laga jeet te biswas jataikina koisey ki South Kamrup para ahibole thaka general election ke ekdam jordar para Congress ke support kuribo. Tai para anuman lagaisey ki Assam te Congress para majority seat pabo.
Add Comment