Dibrugarh, January 14 : Assam laga Dibrugarh district te, ekjun 25 years laga chokra para tailaga 50 years laga baba ke ekta dao para marikina moraidisey aro tailaga body ke ghor pichey fale tupai disey.
Etu mujrim laga naam tu Bidyut Gogoi asey. Taikey Khowang police para Jnauary 13 te dhurisey aro tai para utu din laga phujur te tailaga baba, Parmananda Gogoi ke moraidiya laga jurum kubul kurisiley.
Tai para confess kora hisap te, Bidyut para tailaga baba ke first tu ekta dhar dao para hamla kurisiley, hoilebi tai laga baba nomora tak tai para taikey ekta kulhari(axe) aro lathi para mari thakisey.
Etu picheyte tai para ghor laga picheyte ekta gadda khundikina tailaga baba Parmananda laga deadbody ke tupai disey.
Bidyut para tailaga baba ke moraidiya laga karon tu police ke kobole mana kuri asey etu nimitey etu bhayanak khoon huwa laga maksat tu najanikina asey.
Reports hisap te mujrim laga baba Parmananda laga maiki tu bisi saal agey te taikhan ke charikina ghor para polaijaisey aro tai aro Bidyut ke taikhan laga property te ekla charidisey.
Etu ghotna aro parivar majotey jhamila ola para etu jurum ke ekta role nibhaisey parey.
Etu khoon hoisey koikina janiya tu by chance para asey.
Magh Bihu laga homoitey Parmanada laga sister-in-law para pitha(kha bustu) dibole nimitey taikhan laga ghor te ahisey. Aro etu homoitey tai para fresh gadda khundikina thaka aro etu te khoon laga daagi thaka tu dikhisey aro logalog parosi aro authority khan ke khobor disey.
Khowang police para etu khoon te istamal kora, dao,kulhari aro alag saman khan chiniloisey.
Parmanada laga deadbody ke senior police official khan laga mojudgi te gadda khundikina bahar olaisey aro Dibrugarh te postmortem kuribole nimitey pathaisey.
