Dibrugarh, October 30 : Monday din te Dibrugarh University laga Indri Miri conference hall te huwa ekta programme te sparrow khan ke bachaikina rakhibole nimitey teacher aro student khan ke ekta organic bamboo para bana chirya laga ghosla bhak kurisey.
Etu programme tu Bishram Ghar para sparrow khan ke conserve kurikina rakhibole nimitey awareness feilabole organise kurisey.
Etu programme te kotha koikina, Bishram Ghar laga president Pranab Kumar Talukdar para koisey, “Amikhan laga asli maksat tu sparrow ke bachaikina rakhibole laga asey. Sparrow khan tu duniya te khotom hoijabole laga khatra te asey. Poila te amikhan para amikhan laga ghor te bi sparrow dikhi thakey hoilebi etya noise pollution (bisi shor sharaba huwa) aro building khan bana nimitey sparrow khan ke nidikha hoisey. Amikhan para Guwahati laga 15 jaga te ekta survey kurisey aro etu janibole parisey ki amikhan para ekta bi sparrow ke spot kuribole paranai. Etu sparrow khan laga population tu bisi teji para komti hoi asey.”
Talukdar para koisey, “Jaga ke seher te bodli kuridiya, ghor khan te ventilators dhala laga bodli AC chola, mobile tower para radiation ola, hawa letra huwa, farm khan te puka khan ke morabole laga dawai chola aro khatarnak gas khan ola khan sparrow laga population komti huwa laga asli karon asey.”
Dibrugarh University laga Life Science, Head Of Department, Professor L.R. Saikia para koisey, “ Sparrow komti hoi thaka laga picheyte bisi karon asey. Sob manu bi agey barikina ahibole homoitey sparrow khan ke bachaikina rakhibole nimitey kaam kuribo lagey.”
Add Comment