Assam drivers’ union tu January 5 para 6 tak bus service bon kuribole

Guwahati, January 4 : Ekta dangor kadam utha te, All Assam Day-Night Bus Drivers’ Union para rajya te 48 ghonta nimitey bus service bon kuribole ailan kurisey.

Etu faisla tu Centre para olop din ageyte Bharatiya Nyaya Sanhita 2023 lagu kora laga direct jawab nisna ahisey, khas kurikina gari para manu ke marikina polaija laga mamla ke loikina. Drivers’ union para next dui tin saal bhitor te etu nutun kanoon te bodli anibole demand kuri asey. Aro enaka nukurisey koiley taikhan para strike kora tu baraidibole dhomki disey.

Nutun kanoon laga bhitor te, etu driver khan para manibole napara laga nyom dhala te speed aro laparwahi para gari cholaikina accident huwa te manu murija laga mamla tu bail pabole napara laga jurm maniya aro driver khan ke arrest warrant nohoilebi court laga permission nathakikina arrest kuribole permission diya nisna nyom khan shamil asey. Drivers’ Union laga advisor Rupam Dutta para judi driver khan ke court laga faisla ahibole ageyte jail te dhalidisey koiley taikhan laga parivar tu kinaka gujara kuribo etu laga chinta janaisey aro enaka condition te driver khan ke taikhan laga kaam jari rakhibole laga hosla bhangaidiya tu janaisey.

Bus laga industry, kuntu te poila para driver laga kami thaki asey etu para bhoi khai asey ki etu nutun nyom khan para driver khan ke bus chola laga kaam charidibole hosla barabo aro driver khan laga kami ke aro bisi baraidibo, Drivers’ union para etu nyom te anibole laga bhabna kuribole aro taikhan laga najariya para ekbar bhabna kurikina sabole request kurisey.

Etu strike tu January 5 aro 6 te hobole asey. Judi sarkar para etu union laga chinta khan tu bujinidikina etu kanoon ke hatanai koiley All Assam Day- Night (P) Super Bus Driver Union para strike kora picheyte passenger bukha gari khan ke hodai nimitey bon kuridibole kosom khaisey. Etu kadam para pura Northeast te  passenger aro bhara gari khan ke affect kuribole nisna asey. 

Etu situation te Union Home Secretary para protest kurithaka truck driver khan ke shaam te etu mamla te discuss kuribole lok kuribole asey kilemaney truck driver khan para bi gari marikina polaija mamla te ola nutun kanoon laga khilaf tea was uthai asey.