Assam: Former Mariani MLA, Alak Kumar Ghose morishe

GUWAHATI: Former Mariani MLA Alak Kumar Ghose toh Siliguri hospital te besi din bemar hoikena morishe koishe. Ghose toh 2004 saal te by-election te kamyaab powa beche tui(2) saal MLA korishe. Tai laga umer toh 62 thakishe. Ghose toh National Congress Party (NCP) te aro Bharatiya Janata Party (BJP) te former leader thakishe. Tai ke 2021 saal te Assam Assembly samai BJP para party ticket mon jur nakora nemite, Ghose para Mariani seat te Asom Jatiya Parishad (AJP) para candidate nemite nomination filed korishe. Hoilebi tai laga nomination toh cancelled hoishe. Union ports, shipping & AYUSH minister Sarbananda Sonowal para koishe ke, “former Mariani MLA aro veteran @BJP4Assam karyakarta Alok Kumar Ghosh mora khobor hona nemite besi mon dukh ase, tai toh bhal social worker ekta thakishe aro tai mori jowa toh ami khan sob nemite tangor nokson ase. Ami laga mon dukh kotha toh janai ase aro tai nemite parthana kori ase. Om Shanti.” Assam power & sports minister Bimal Borah para be koishe ke, “Mariani laga former MLA aro BJP4Assam laga veteran karyakarta, Alok Kumar Ghosh mora nemite besi mon dukh ase,” koikena janaishe. “tai toh dedicated social worker thakishe, tai para state laga party nemite besi bhal aro tangor kam korikena ahishe. Ami laga mon dukh howa toh tai laga ghor manuh logot janaishe ase,” koikena Borah para aro koishe. Assam education minister Dr Ranoj Pegu para be janaishe ke, former Mariani MLA Alok Kumar Ghosh dangoriya mori jowa khobor honikena besi mon dukh te ase. Ami laga mon dukh khobor toh tai laga ghor manuh sob toh janai ase. Tai laga atmaa toh shanty te thakibe.