Guwahati, November 01 : Assam government para Assam laga medical aro dental college khan te Bhutan laga student khan nimitey 5ta seat reserve kuribole faisla loisey. Etu faisla tu November 3 aro 4 te,Bhutan laga raja para Assam ke visit kuribole thaka nimitey ekta goodwill gesture nisna loisey.
Bhutanese student khan nimitey seat reserve kuribole laga faisla tu Chief Minister Himanta Biswa Sarma para November 1 te ekta cabinet meeting rakha homoitey luwa laga thakisey. Etu picheyte, cabinet minister Jayanta Malla Barua para announcement kurisey aro koisey ki MBBS nimitey 3ta seat reserve kuribo aro BDS nimitey duita seat reserve kuribo.
Baruah para etu bi koisey ki tai tu Bhutanese raja Jigme Khesar Namgyel Wangchuck ke Assam te visit kuribole nimitey rukhi asey. Tai para koisey ki Bhutan laga raja para Assam ke visit kora para Assam aro etu laga osor te thaka desh Bhutan laga majotey rishta ke majboot kuridibo. Etu para turism industry aro Assam laga alag sector khan te bi faida pungchabo. Sarkar ara Bhutanese raja laga visit tu smooth para jable dibole nimitey sob jaruri arrangement banaisey.
November 1 te aro ekta jaruri decision luwa tu etu saal laga pora likha te bisi bhal kora student khan ke Anandram Barooah award dibole laga tarik ailan kora laga thakisey.
Add Comment