Assam : Karimganj te Rs 100 crore opor drugs recover kurisey

Guwahati, January 09 : Assam laga Karimganj district laga police para Rs 100 crore opor laga drugs recover kurikina chiniloisey.

Taikhan para dhora drugs tu 5 kilograms para bisi asey aro 6=etu te 64 thousand Yaba tablet shamil thakisey.

Etu drugs tu Assam police laga special task force (STF) aro Karimganj police laga official khan para ekta talashi kora te paisey.

Etu search operation ke Assam police deputy inspector general (DIG) Parthasarathi Mahanta aro Karimganj SP Partha Protim Das para lead kurisey.

Etu drugs tu Tuesday (January 09) te Assam laga Karimganj district te thaka Nilam Bazar police station laga under te thaka Suprakandi te dhurisiley.

Etu drugs dhora laga connection te police para char jun manu ke arrest kurisey.

Charjun arrest huwa manu majotey ekjun manu laga naam Nur Ahmed thakisey aro tai tu Assam laga Karimganj district para thakisey.

Baki tinjun arrest huwa manu majotey : Zosangliani, Ramngheaka aro Lalchamliana bi asey. Aro taikhan sob bi Mizoram laga Thenzawl jaga para asey.

Etu case tu ajikali Assam te drugs dhora majotey ekta sobsey dangor mamla asey.