Guwahati, March 6 : Assam laga Chief Minister Himanta Biswa Sarma para March 6 te HSLC (class 10 board exam) laga paper leak huwa laga report ola majotey SEBA secretary Naranyaran Nath ke samne te ahibole adesh disey.
Sources laga hisap te Board of Secretary Education Assam laga secretary ke jawab dibole 3 din laga homoi disey.
Sarma para koisey ki utu exam centre kotey answer cheating kora laga ghotna hoisey etu exam centre te HSLC laga exam tu cancel kuridibo aro etu centre khan te exam likha candidates khan nimitey alag exam lobo.
Etu opor te exam laga question paper khan kuntu exam centre para leak hoisey etu centre laga khilaf te action lobo.
March 6 te Assam laga Cachar district te HSLC (class 10 board) laga Maths laga question paper leak hoisey.
Etu HSLC exam laga second din te Maths exam dhalibole suru huwa 15 minute pichetey question paper tu viral hoisey.
Online te bi etu question paper laga kunba picture khan tu viral hoisey. Aro enaka koi asey ki etu paper tu Lakhipur laga exam centre para leak hoisey.
Hoilebi Cachar Education Department tu etu paper leak huwa laga mamla te jawab dibole baki asey.
Exam laga first din te enaka khobor ahi thakisey ki Barpeta district para English laga question paper leak hoisey.
Etu mamla te jawab dikina SEBA laga secretary aro exam controller Nath para etu khobor khan tu misa misi asey koisey koisey. Aro media laga reports khan tu gala taro misa misi asey koikina koisey.
Etu saal laga Assam laga HSLC exam te 4,23,000 students exam dhali asey. Aro exam khan tu National Education Policy (NEP) para nyom bana laga hisap te loi asey.
Add Comment