Guwahati, February 11 : Assam cabinet para Saturday din te Assam te Uniform Civil Code (UCC) introduce kora laga mamla uthaisey. Hoilebi etu mamla te final decision luwa nai.
PHE minister aro official spokesperson Jayanta Mallabaruah para cabinet meeting picheyte reporter ke koisey, “Amikhan para cabinet meeting te bisi saman discuss kurisey. Hoilebi ami para apni khan ke ekta akhri faisla luwa picheyte hey kobo paribo. Ami para office laga raaj ke raaj rakhibole laga kosom khaisey. Aro cabinet te amikhan para ki faisla kurisey etu tu kobole naparibo.
Etu ageyte, Assam Chief Minister Himanta Biswa Sarma para koisey ki Uttarkhand laga sarkar para February 05 te assembly house te ekta bill introduce kora picheyte Assam laga sarkar para ekta UCC bill introduce kuribole bhabna kuri asey.
Etu cabinet para sob chamatkar para manu khan ke healing kora laga kaam khan ban kuribole monjuri disey. Etu te Christian healing bi shamil asey.
Etu minister para koisey, “Ilaj kora laga naam te magical healing(jadoo para bimar dur kuridiya) laga sikar huwa manu khan ke relief pungchabole nimitey cabinet para Assam healing (prevention of Evil Practices) Bill, 2024 approve kurisey kuntu te ilaj laga naam te illegal kaam kora dhora kha manu ke jail aro fine laga sajai diye.”
Tai para koisey, “Etu Bill para kotha kuribole napara, suku dikhibole napara, haath theng thik nathaka aro autism nisna jonom para hoikina aha bimari laga ilaj kora laga naam te jadoo para heal kora laga kaam tu dur kuribole bisaribo.”
Add Comment