Assam-Mizoram CMs para Amit Shah lok paishe

November 26, 2021: Assam-Mizoram border row pithor te tangor kam ekta nemite tuita(2) states laga chief minister para union home minister Amit Shah logot New Delhi te lok paishe. Thursday rathi te, Mizoram chief minister Zoramthanga aro tai laga Assam counterpart Himanta Biswa Sarma toh New Delhi te dinner samai kotha korishe. Etu meeting toh New Delhi te Assam Bhawan te thakishe. Assam minister Atul Bora be tuita(2) states laga chief ministers osor te samil thakishe. Assam aro Mizoram laga chief ministers pithor te etu meeting toh tin(3) moina akhe te tuita(2) states laga police forces majot te inter-state boundary nemite larai hoikena 6 jun manuh mora beche te thaki ase koishe. Assam chief minister Himanta Biswa Sarma aro Mizoram CM Zoramthanga para etu meeting toh ‘cordial’ ase koikena janaishe. Hoilebi, tuita(2) states laga chief ministers para be meeting samai ke kotha korishe etu laga khobor sob toh kuboli mana korishe. Meeting kora beche media logot kotha kora samai Mizoram laga chief minister Zoramthanga  para koishe ke, “ami khan toh sathi bhal ase, moi khan dada-bhai neshina ase. Moi khan eke logot union home minister Amit Shah logot lok koriboli ase.” Etu samai, Assam chief minister Himanta Biswa Sarma para koishe ke, dinner samai kotha besi kora nai. “ami nejor Mizoram CM Zoramthanga ke bhal relationship share korishe. Ami khan sathi bhal ase. Ami khan Delhi besi din visit kora nai aro itya ami khan yati ase, etu nemite ami tai ke dinner invite kora ase,” koikena CM Sarma para janaishe. Assam-Mizoram border toh 165 km ase aro etu te jamila besi ase, etu nemite samai-samai te civilians aro police forces pithor te larai olai thaki ase.