Guwahati, 25 March : Assam Assembly te March 25 tarik te ekta Bill pass kuri dise, jun tu private coaching centre khan regulate kuribo nimite ase. Itu Bill te sob coaching institute khan laga registration must ase aru diya thaka niyom khan strict kuri follow kuribo lage.
Bill upor te discuss kurithaka time te, MLA Sherman Ali Ahmed ke Deputy Speaker Numol Momin House pora suspend kuri dise, ekta minister laga reply disrupt kurithakile karone. Ahmed jun Congress pora agey suspend hoijase, Education Minister Ranoj Pegu kota kurithaka time te intervene kuribo try kurise, tai karone deputy speaker tai ke 10 minute nimite suspend kuri dise.
Pegu jun noutun law itu introduce kurise, tai koise ki itu Bill laga main objective tu coaching centre khan laga commercialisation control kura aru guardian khan ke justice diya nimite ase. Tai koise, “Guardian aru student khan ke mislead nahoi jabo karone, coaching institute upor te ekta regulation thakibo lage. Tai karone, ami itu Bill anise.”
Pegu koise ki itu Bill te thaka provision khan bhal pora evaluate kuri include kuri dise, aru law notify hoijaka pichete, thaka coaching centre khan ke registration apply kuribo nimite 30 din laga time dibo.
Tai clarify kuri dise ki coaching centre khan mainly engineering aru medicine nisina higher education institution te admission rakhibo nimite student khan ke prepare kuribo karone ase, tai karone itu Bill te 16 saal aru opor laga student khan nimite provision rakhi dise.
‘The Assam Coaching Institutes (Control and Regulation) Bill, 2025’ jun voice vote pora pass hoise, itu te private coaching centre aru institute khan laga regulation thakibo, jun tu competitive exam preparation te bhal academic support dibo nimite ase.
Bill te itu bhi mention kuri dise ki kunuba coaching institute religion convert kura nisina kothat involve nahobo aru Constitution te diya secular principle strict kuri follow kuribo lage.
Registration apply kuribo nimite, institute khan ke curriculum, class duration, student khan karone co-curricular activity, teacher khan laga academic qualification, tuition fees, physical infrastructure aru facility laga information dibo lage.
Registration certificate laga period duita saal thakibo, tai pichete renewal nimite reapply kuribo lage, itu Bill laga provision hisab te.
Sorkar ekta portal nai online mechanism develop kuribo, jate registration process minimum human interface pora facilitate kuribo pare.
Jodi kunuba coaching institute itu law laga provision violate kuri thakile, sorkar tai laga registration cancel nai suspend kuribo pare.
Add Comment