Guwahati, January 17 : Ekta dangor kamyabi hasil kora te, Assam para London, England te 1,000 kg laga lablab beans(nagamese te Shim) supply kurisey.
State Agriculture Minister Atul Bora para kuwa hisap te, Assam laga Sivasagar district laga Nitaipukhuri laga Dhingparia FC jaga laga kisan khan para 1,000 kg shim produce kora tu London te supply kurisey.
Agey barikina, FPC para London te shim supply kora tu etu second bar asey. Kilemaney olop din agyete taikhan para 500 kg shim supply kurisiley.
Assam laga Chief Minister Himanta Biswa Sarma para tailaga X(Twitter) Handle te enaka likhisey, “London te 1,000 kg shim( Assam te Urohi koi) supply kurisey koikina janibole khusi asey. International market te Assam laga kheti laga saman laga demand bara tu amikhan laga kisan aro amikhan laga Sarkar para amikhan laga kheti bari laga sector ke overtake kuribole nimitey mehnat kora tu dikhai asey.”
Ageyte December 2023 te, 5000 Assam limbu aro komsikom 500 kg shim tu London laga market te pathaisiley.
Etu flag-off ceremony ke Assam laga Agriculture Minister, Atul Bora para December 27 te virtually attend kurisey. Aro etu para international market te risk loikina business kora kisan khan nimitey ekta dangor kamyabi hasil kora tu mark kurisey.
