Guwahati, February 02 : Nijor ke Assam Police laga Sub Inspector asey koikina kuwa manu Manash Borgohain, kunke ban hoikina thaka militant group United Liberation Front of Asom (ULFA-I) laga camp te dhurikina rakhi asey tai para koisey ki Manash Chaliha tu police special branch laga zonal head asey aro tai nijor ke bachabole nimitey Manash Borgohain logotey eku link nai koikina koi asey.
Ekta nutun release huwa video te, Manash Borgohain, kunke Assam police para ULFA-I camp te jasoosi kuribole nimitey pathaisiley tai para koisey ki Manash Chaliha tu taikey janey aro taikhan duijun majotey link thaka laga kotha koisey.
Borgohain para enaka koisey, “Manash Chaliha para koisey ki tai tu moikey ekdam najaney. Ami para etu kobole mon asey ki tai tu misa koi asey kilemaney tai tu nijor ke bachabole kosis kuri asey. Tai ami ke personally janey, kilemaney amilaga girlfriend Sumi Borah, kun Deragaon para asey, tai tu Manash laga girlfriend Pinky laga purana sathini asey. Taikhan duijun tu ekey school te purisey aro ekey busti para asey. Aro taikhan laga boyfriend huwa nimitey, Manash amikhan duijun tu ekjun ekjun ke janey. Tai tu SB laga zonal head asey. Tai para amikhan laga sob photo aro information khan delete kuridisey aro etya amikey najaney koi asey.”
Manash Borgohain para agey barikina koisey ki Manash Chaliha para sob manu ke koi asey ki tai tu ekta kheti bari kora manu asey aro SB laga officer nohoi. Jasoos Manash Borgohain para koisey ki Manash Chaliha para etu nimitey enaka koi asey taki judi kunbi dhora khaisey koile tailogotey taikhan laga link wapas nahibo. Tai para agey barikina koisey ki Manash Chaliha tu maiki khan tke training diya te bi shamil asey taki taikhan para ULFA-I leader khan ke taikhan laga jaal te fasabo paribo.
Tai para enaka koisey, “Manash Chaliha para amikey kinaka treat kurisey etu nisna hey tai para recruit kora maiki khan ke sex education te training di asey. Tai para etu chukri khan ke ULFA-Independent leader khan ke jaal te fasabole special training disey. Sob manu para bi jani asey ki Manash Chaliha para job dikina manu khan ke poisa para attract korey. Maiki khan te surgery bi kurisey taki taikhan para ULFA-Independent laga leader khan ke sexually attract kuribo paribo.”
Borgohain laga etu nutun video tu ULFA-I para February 1 te Assam police ke Manash Chaliha laga against te eku action nuluwa nimitey sawal kurikina ekta letter release kora picheyte disey.
Manas Borgohain para Manash Chaliha aro Digambar Pandey para taikey ULFA-I laga jasoosi kuribole laga mission laga hisa banaisey koikina ekta video ola picheyte January 31 te Manash Chaliha para media ke kotha kurikina enaka koisey, “Ami tu Manas Borgohain ke najaney aro amilogotey enaka eku contact nai. Ami para 2012 te engineering pass kurikina bisi alag alag multinational company khan te kaam kuri thakisey utu homoi para etya tak. Police hoilebi ULFA-I hoilebi amilogotey taikhan eku lena dena nai.”
Tai para enaka koisey, “2012 para loikina, ami tu bisibhak kaam nimitey Assam laga bahar te buhi thakisey. Manas Borgohain para koisey ki ami tu SB laga zonal head nohoilebi RAW laga ekta officer asey. 2021 para 2023 tak ami tu Assam laga bahar te Vijayawada aro Meghalaya te kaam nimitey buhi thakisey. Juwa ek saal para, ami tu Aizawl te government logotey kaam kuri asey. Etya ami para utu kaam charikina nijor laga business suru kuribole plan kuri asey.”
Manas Chaliha para koisey ki ULFA(I) para utu video publish kora homoi para tai tu chinta rao insecurity para dukh paikina thaki asey. Aro tailag aparivar khan bi chinta hoikina thaki asey koisey.
