Guwahati, Decemebr 29 : Assam laga police para ULFA-I logotey link thaka manu khan ke arrest kurikina atangwad laga khilaf te taikhan larayi kora te ekta dangor kamyabi hasil kurisey.
Etu arrest tu November 22, December 9 aro Decemebr 13 te Assam laga Tinsukia, Sivasagar aro Jorhat district te 3ta grenade(chutu bomb) blast kora laga connection te kora laga asey.
ULFA-I para etu blast kora laga picheyte taikhan laga haath asey koikina claim kurisiley.
Assam laga DGP, Gyanendra Pratap Singh para etu operation laga tariff kurisey kuntu ke pura kuribole nimitey bisi hapta lagisey. Etu operation te mujrim khan ke arrest kurikina etu grenade blast kora homoitey chola motorcycle ke bi taikhan laga giraft te loiloisey. Police force laga mehnat nimitey Sivasagar district para 8jun suspect thaka manu aro Tinsukia aro Jorhat district para duijun -duijun manu ke dhuribole parisey.
DGP GP Singh para X(Twitter) handle te enaka koisey, “Bisi hapta para chuli thaka ekta ekdam bhal operation te, ULFA-I para Tinsukia, Sivasagar aro Jorhat te bomb blast kora laga 3ta jurum laga case tu crack kurisey aro mujrim khan ke arrest kurikina etu ghotna te chola motorcycle bi recover kurisey. Etu mujrim khan ke online platform para bharkaidya manu khan laga jankari bi paisey aro taikhan kuntu kona te thakisey koilebi taikhan ke dhurikina anibo. Sabut tu homoitey kanoon laga court te pesh kuribo. Assam police para rajya laga manu khan ke sob jurum para bachabole nimitey taikhan laga nijhi zindigi aro kaam ked aw te rakhikikina teji para kaam kuri asey. Etu operation te shamil thaka sob officer aro manu khan ke amilaga compliments aro dhanyabad janaidi asey. Amikhan para Assam Police flag ke ucha uribole dibole resolve kuri asey.”
Add Comment