Guwahati, October 26 : Assam laga sarkar para government job kora kun officer nohoilebi staff khan bi dusra shaddi nukuribo lagey koikina ekta order issue kurisey.
Reports hisap te, etya para, taikhan tu second marriage(dusra shaddi) tu rajya laga arkar laga permission noloikina kuribo naparibo.
Etu kanoon ke namanikina etu laga against te second shaddi kora sarkari employee khan para bisi dangor fine terabole lagibo aro department laga taraf para bi inquiry jhelibole lagibo.
Etu notice tu Bodoland Territorial Region (BTR), Karbi Anglong aro Dima Hasao Autonomous Council te bi pathaisey.
Assam laga sarkar laga Additional Chief Secretary Niraj Verma para aha ekta order te enaka koisey, “ Kun government job kora manu bi maiki zinda thaki thakikina Government laga permission first noloikina dusra shaddi nukuribo lagey. Personal kanoon laga under te enaka shaddi laga izazat thakisey koilebi.”
Agey barikina, kun government job kora maiki para bi government laga izazat first noloikina already maiki thaka mota ke shaddi nukuribo.
Opor te nyom dikina thaka laga context te, Disciplinary Authority para Assam Services (Discipline and Appeal) Rules 1964 laga nyom bhitor te logalog Assam Civil Services (Conduct) Rules 1965 laga Rule 26 ke bhanga government employee Departmental Proceedings suru kuridibo parey.
Add Comment