Sports

Australia tu World Test Championship (WTC) 2023-2025 te jaga banaisey, India out hoisey

January 6, 2025
7 Views

January 05: Australia para World Test Championship (WTC) te 10 years picheyte Border-Gavasker Trophy wapas hasil kuribole nimitey fifth aro final Test te India ke six wickets para haraidisey. Enaka kurikina, Australia para World Test Championship (WTC) 2023-2025 final te taikhan laga jaga banailoisey. Finals tu taikhan etu saal South Africa laga against te khilibole asey. Aro etu match tu London laga Lord’s Cricket Ground te hobole asey. Etu jeetikina, Australia para taikhan laga second sidha WTC final qualification hasil kurisey aro India tu out hoijaisey. Australia para etu Border-Gavasker Trophy(BGT) tu 3-1 score para harisey. 

South Africa tu taikhan laga first World Test Championship (WTC) final nimitey juwa moina te already qualify hoikina thakisey. Australia ke final nimitey qualify hobole karney taikhan laga last 3(tinta) Test te khali ekta jeet hasil kuribole laga  jarurat thakisey. Captain Pat Cummins para lead kora Australia team ke etu jeet hasil kuribole nimitey khali tin-din lagisey. Cummins tu World Test Championship (WTC) laga etihas te 200 Test wickets luwa first player bi hoisey. 

India nimitey, etu haar laga zimidar tu taikhan nijor asey. Nijor laga desh te Bangladesh laga khilaf te 2-0 para jita picheyte, India tu lagatar 3rd baar WTC final te pungchibole nimitey pura puri tayar thakisey. 

Hoilebi, nijor desh te Newzealand laga haath te 0-3 para harija para taikhan laga ambition ke khatra te dhalidisey. Australia te, India tu etu race para out hoijabole nimitey taikhan logotey bachikina thaka 4ta game majotey 3ta game harijabole ageyte first game tu jitisiley. 

Australia tu duita Test te next Sri Lanka logotey khilibole asey. Etu match tu Sri Lanka laga Galle International Stadium te hobole asey. 

Australia aro South Africa laga majotey World Test Championship (WTC) final tu June 11-15 te khiliboley asey. Lord’s para first time World Test Championship (WTC) final host kuribole asey. First duita World Test Championship (WTC) final tu 2021 te Southampton aro 2023 te London laga The Oval te kurisiley.