Panaji, February 15: Saturday din te Karnataka te Goa laga ekta ek-MLA ke ekjun auto driver para behes kurithaka homoitey mara picheyte olop minute hoikina tai ekta hotel te girikina murijaisey.
Police para etu auto driver ke arrest kurisey.
Etu ex-MLA tu Congress leader Lavoo Mamlatdar thakisey. Tailaga umar tu 68 years thakisey. Tai Belagavi te eta business trip nimitey jai thakisey, kuntu toh Goa laga Panaji para 120km maan dur asey. 2012 te politics join kuribole ageyte, Mamlatdar tu Goa te ekta deputy superintendent of police-rank officer thakisey.
Ekjun senior Karnataka police department official hisap te, Mamlatdar aro ekjun auto driver tu ekta accident huwa picheyte behes kora suru hoisey.
Muk laga-lagi kuri thaka homoitey, etu autodriver para taikey bisi bar marisey koikina etu official para etu jaga laga CCTV te dikhisey koikina koisey.
Mar kha picheyte, Mamlatdar tu ekta hotel te jaisey kotey tai siri te girijaisey. Taikey ekta government hospital te loijaisiley hoilebi taikey admit kuribole ageyte murisey koikina declare kurisey.
Belagavi police para etu autodriver ke custody te rakhi asey.
Mamlatdar tu 2012-2017 majotey Goa Legislative Assembly laga ekta member thakisey kun para Maharashtrawadi Gomantak Party (MGP) ke represent kuri thakisey. Tai tu Congress party te 2022 te join kurisey aro utu saal te Madkai jaga para Goa election nimitey contest kurisey hoilebi tai jitanai.
Add Comment