Wokha, October 23 – Banana Festival 2025 laga first edition toh 22nd October 2025 te Wokha Public Ground te suru hoishe, “Banana for Food, Fibre and Future” laga theme nimite. Etu tin din event (October 22–24, 2025) ekta important initiative ase juntu agriculture innovation promote kuribole, farmer khan ke empower kuribole, aru Nagaland pura te market connection strong banabole aim kuri ase.
Inaugural ceremony te Deputy Chief Minister & Minister of Planning & Transformation and National Highway, T. R. Zeliang chief guest hisap te attend kurishe. Tai logote ase Minister of Environment, Forest and Climate Change, C. L. John; Minister of Women Resource Development, Salhoutuonuo Kruse; aru MLA & Advisor to Water Resources, Tongpang Ozukum. Deputy Chief Minister & Minister of Home & Border Affairs, Yanthungo Patton chief host thakishe, aru MLA & Advisor for Agriculture, Mhathung Yanthan, aru MLA Y. Mhonbemo Humtsoe host hisap te attend kurishe.
Inaugural programme laga main highlight toh hoishe Memorandum of Understanding (MoU) sign aru exchange kurishe District Administration Wokha aru tinta national research body logote- ICAR–National Research Centre for Banana, Tamil Nadu, Institute of Bioresource and Sustainable Development (IBSD), Imphal, CSIR–North East Institute of Science and Technology, Jorhat.
Etu MoU laga main aim ase long-term partnership establish kuribole — technology aru science integrate kuribole, modern farming promote kuribole, production increase kuribole, sustainable practice aru farmer training kuribole, aru market linkage improve kuribole.
Speech te Deputy Chief Minister T. R. Zeliang appreciation dishe organizing committee ke aru eneka visionary idea loijai thaka karone. Tai koishe etu festival toh producer aru consumer khan ke connect kuribole, local economy boost kuribole, youth khan karone employment generate kuribole, aru entrepreneurship promote kuribole. Tai government department khan ke encourage kurise eneka initiative ke support kuribole — khali Wokha karone nohoi, hoilebi Nagaland pura karone. Tai sustainable practice laga importance mention kurishe aru state, district aru national level institution khan laga collaboration ke appreciate kurishe. Tai koishe, Wokha district ke economic hub banabole potential ase aru Nagaland laga GDP te contribute kuribo paribole. Tai scientist khan ke request kurishe district development karone best research aru guidance dibole. Employment bisar te, Zeliang koishe skill-based aru vocational training te focus kuribole, juntu entrepreneurship para sustainable income generate kuribo pare. Tai conclusion te koishe — etu festival toh ekta opportunity ase khali aji karone nohoi , hoilebi future nimite bhi ase.
Deputy Chief Minister Yanthungo Patton bhi tai laga speech te organizing committee aru partner institution khan ke appreciate kurishe. Tai Wokha ke “land of plenty” hisap te recognize kurishe aru koishe ki etu festival rural economy ke improve kuribole. Tai highlight kurishe ki etu event te sob stakeholder khan milaikina economic field ke aage loi jabole paribo. Technology access, farmer training aru market connectivity laga importance bhi mention kurishe, aru SHG aru village-level farmer khan laga effort ke praise kurishe. Tai koishe government eneka initiative support kuribo aru livelihood improve kuribo. Deputy Commissioner Wokha, Vineet Kumar, IAS, keynote address te explain kurishe festival kinika shuru hoiseh, ki concept ase aru One District One Product initiative logote kinika link ase. Tai highlight kurishe Wokha te banana laga availability, cultivation aru quality, aru district laga agricultural potential. Tai Vision Document, technology integration, market gap, challenges aru opportunities bhi discuss kurishe.
Agriculture Production Commissioner, V. Shashank Shekhar, IAS, youth participation, farmer training aru research encourage kurishe, naike banana te, aru anya agricultural product te bhi. Director of ICAR RC–NEH Region, Dr. S. Hazarika, koishe ki Banana Festival unity in diversity laga example ase.
Managing Director of TRIFED, M. Raja Murugan, brief speech te TRIFED laga main objective explain kurishe — tribal community khan ke empower kuribole, marketing support, value addition aru sustainable income generate kuribole.
Festival te 100 para beshi exhibition stall ase, juntu te different village, block aru department khan participate kurishe. Exhibit khan te include ase alag-alag banana species, banana product aru local innovation. Event te launch bhi kurishe: Yuthi Delights (local brand), Banana Growers Network, Banana Chocolate, Lotha Dialect Information Brochure, KVK-Wokha Information Brochure (special guest aru chief host para release kurishe)
Cultural performance bhi hoishe Nrung Longidang Village Cultural Troupe para, juntu opening day ke lively banai dishe. Interactive competition bhi hoishe — Banana Eating Competition aru Banana Salad Making Competition.
Inaugural session piche te National Workshop on Banana Plantation, Production, Value Addition and Marketing bhi hold kurise Lotha Hoho Ki, Wokha te. Etu workshop te expert, scientist, policymaker aru stakeholder khan discussion kurishe “Envisioning 360° Banana Hill Ecosystem – Science, Policy, Market and Finance in Action” laga theme te. Discussion te focus kurishe research aru practice laga gap bridge kuribole, farmer capacity enhance kuribole, aru policy ke market aru finance system logote align kuribole.
Next duita din festival continue kuribo — buyer-seller meet, technical training farmer khan karne, aru exhibition aru activity juntu agriculture entrepreneurship aru rural development promote kuribo.Banana Festival 2025 toh Wokha district aru Nagaland agriculture sector karone ekta historic milestone ase. Etu event policymaker, scientist, farmer aru entrepreneur khan ke ekta platform te anikina sustainable development, technology advancement aru economic empowerment promote kuribo. Etu festival khali ekta crop celebration nohoi — etu ekta vision, collaboration aru future prosperity laga celebration ase.
Add Comment