Bangladesh High Court manishe

October 23, 2020. Bangladesh  High Court para Rajshahi Jail laga superintendent logot jail bahar te shaty lobo arrange koriboli koishe. Ek jun para rape kora nemite life jail te ase aro kaun maiki ke rape korishe, tai jun jail gate bahar te shaty koribo ase koishe. Court para aro jail authorities ke koishe, shaty khobor toh 30 din pithor te janai thiboli koishe, kokena Dhaka Tribune para khobor thishe. High Court bench, Justice M Enayetur Rahim aro Justice Md Mostafizur Rahman para tuita side laga shaty kotha hona beche order passed korishe. Thursday din mota para bail petition filed kora toh hona beche thakishe. Advocate SM Shahed Chowdhury para rape kora manuh laga side te kara korishe aro Deputy Attorney General Md Sarwar Hossain Bappi para state nemite kara thakishe. Case statement hesab te, rape kora manuh nam toh Dilip Khalko, baba nam Sitanath Khalko, Rajshahi laga Godagari upazila chaka para ase, etu manuh toh ghor manuh logot affair thaka ase. Dilip Khalko para maiki logot toh shaty koriboli wada korikena tai jun physical relationship thakishe. October 23 darik, 2011 saal te, maiki toh hospital te elaj nemite jaishe koishe. Aro October 25, 2011 te, maiki para Godagari police station te Dilip oper te case filed korishe. January 29, 2012 saal te mota logot maiki para kalti kam kora lakai thishe. Case lowa samai, June 12, 2012 te court para Dilip Khalko ke jevan pura jail te thakiboli sajaa paishe aro tai oper te Tk50,000 fine be korishe. Etu fesla lowa beche, Dilip toh etai be jail te thaki ase. Hoilebi, olop agae din te Dilip para bail petition filed korikena ase. Hearing thaka samai Dilip laga Lawyer para koishe ke, bail toh kam ase, keli koile mota aro maiki toh shaty koriboli monjur hoikena ase koishe.