Bangladesh para Covid-19 vaccines trial kuriboli ase

August 21, 2020. India para bona Covid-19 vaccine toh Bangladesh khan trials kuriboli ready te ase aro tai khan logot tawai joti supply baboli ase koishe. New Delhi para osor desh eastern Bangladesh ke sati manikena ase, hoilebi Beijing para tai khan logot besi mela nemite bhapana ase. Prime Minister Narendra Modi para tai laga foreign secretary ke, Tuesday din Bangladesh capital Dhaka te tui(2) din nemite botaishe aro etu samay Bangladesh Prime Minister Sheikh Hasina aro officials khan logot meeting thakishe koishe. “Bangladesh toh COVID vaccine bonaboli ready ase aro etu samay trial kurikena jolti para vaccine toh ketai ready hobo paijabo” foreign ministry para statement te koishe. Foreign secretary aro Indian laga counterpart Harsh Vardhan Shringla meeting thakina etu samay Shringla para India laga economies oper te vaccine bonaboli Bangladeshi officials logot kotha koishe, koikena statement para janai dishe. “tai khan (India) para acha koikena manishe, aro koishe ke, vaccine toh tai khan ekla nemite bona nahoi hoilebi dosura desh nemite be bonaboli ase koikena Bangladesh laga Foreign Secretary Masud Bin Momen para meeting te reporters khan logot koishe. Tai aro koishe ke, “Bangladesh nemite vaccine toh primary stage samay babo”. India toh Duniyaa te vaccine bona tangor company ekta ase koishe. Aro India laga Serum Institute of India para etai tinta (3) coronavirus vaccines trials kuriase, aro etu pithor te ekta toh Oxford University laga AstraZeneca Plc, licensed be ase koishe. Bangladesh laga state medical research agency para khobor dishe ke, coronavirus bemari cases toh 285,091 hoikena ase aro 3,781 manuh morikena ase. Jaa moina, China laga Sinovac Biotech Ltd para bona vaccine toh Covid-19 third-phase trial kuriboli hokom thikena ase koishe.