New Delhi, January 11: Board of Control for Cricket in India (BCCI) laga Vice President Rajeev Shukla para Sunday din te confirm kurisey ki Indian Premiere League (IPL) 2025 laga 18th season tu March 23 te suru hobole asey. Sob 10ta franchise para November 24 aro 25 te Jeddah te huwa dangor auction te nijor posond laga squad chuniloisey. Etu auction khotom huwa picheyte, etu league kitya suru hobole asey etu laga possible date laga bari te baat-chit chuli thakisey. Rajeev Shukla, kun para Mumbai te Special General Meeting (SGM) attend kurisey. Tai reporters khan logotey kotha kora homoitey IPL 2025 laga date reveal kurikina koisey, “IPL tu March 23 para suru hobole asey.”
Juwa season te, IPL 2024 tu March 22 te suru hoisiley. Jitya Royal Challengers Bengaluru para Chennai Super Kings ke haraidisey. Aro finale tu May 26 te MA Chidambaram Stadium, Chennai te hoisiley.
Kolkata Knight Riders, kun 2024 laga IPL season jeetisey, taikhan tu etu saal laga defending champions asey.
Reporters khan logotey baat-chit kora homoitey Shukla para etu bi confirm kurisey ki WPL laga venue(match hobole thaka jaga) tu finalise hoisey aro joldi declare hobole asey.
Add Comment