BCPL employees 10 jun ke Covid positive paishe

DIBRUGARH: Assam te Brahmaputra Cracker & Polymer Limited (BCPL) laga 10 jun employees logot COVID-19 positive tested paishe koishe. Khobor hesab te employees kaun khan logot virus bemar thurishe, etu manuh khan pithor te besi wala toh dosura state para ahiyaa khan ase koishe. “manuh khan besi wala toh hospital te admitted hoikena ase aro konuba khan toh ghor te isolation te bohi ase,” koikena BCPL source para janaishe. Brahmaputra Cracker & Polymer Limited (BCPL) laga Chief Manager, Manab Jyoti Dowerah 45 umer toh Wednesday din Dibrugarh te Assam Medical College & Hospital (AMCH) 11.30 am samai COVID bemari para morishe koishe. Dowerah toh upper Assam,  Jorhat district laga manuh ase aro tai toh AMCH te olop din para elaj kori thakishe koishe. “Manab Jyoti Dowerah toh ajanak mora nemite ami khan besi mon dukh hoishe. Tai ke  COVID-19 positive test thura beche AMCH te elaj kori thakishe,” koikena BCPL official para janaishe. Friday din Dibrugarh district te 1824 tests lowa te 24 positive cases paishe koishe.