Sub-Divisional Planning and Development Board (SDPDB), Bhandari para 7 January 2025 te GA summer house te taikhan laga monthy(hodai moina te ekbar kora) co-ordination meeting kurisiley. Etu meeting laga chairman tu MLA aro SDPDB, Bhandari laga Chairman Achumbemo Kikon thakisey.
Additional Deputy Commissioner & Vice Chairman, SDPDB Bhandari, Longasen Lotha, NCS para welcome address disey. Aro Bhandari subdivision te nutun-nutun posting hoikina thaka officers aro Bhandari Town Councilors laga duijun Governmnet nominees khan ke introduce kurisey.
MLA aro SDPDB, Bhandari laga Chairman Achumbemo Kikon para tailaga khata speech te tatey laga members khan ke taikhan ke dikina thaka duty aro zimidari khan te samaj ke behtar banabole aro development anibole nimitey nijor te aro bi dedicate kuribole request kurisey.
Etu meeting laga suruwat tu juwabar laga meeting laga reports khan ke review kurikina hoisey. Etu picheyte, Sub-Divisional Office Complex Bhandari banabole laga proposal te discussion hoisey. Kotey maati-malik para Nagaland laga Government ke taikhan para etu banabole nimitey lagi thaka maati tu Government para rakha rate te dibole monjur hoisey. Aro kanooni agreement tu Government para thik-thak maati select kora picheyte kuribo.
Etu meeting te, SDEO Bhandari para GMS Yampha ke GPS te downgrade(level namaidiya) kuribole laga decision tu cancel kuribole laga proposal rakha opor te discuss kurisey. Taikhan para monjur hoikina etu proposal tu higher authority te forward kuridisey.
ADC para etu department ke January 2025 laga aha hapta fale Civil Administration logotey busti aro inspirational busti khan te inspection tour te jaidibole bi request kurisey. Etu mamla te, etu board para 2025-2026 saal nimitey Champang ke Inspirational Area chunibole faisla kurisey.
SDO (Electrical), Sanis para etu meeting te taikhan laga Department para etu sub-division under te kaam khan kora aro initiatives luwa laga jankari disey. Dusra department khan para bi etu meeting tea lag alag kaam kora tu janaisey.
Add Comment