Nagaland laga rasta khan tu poila para sabole biya thakikina ahi asey. Enaka homoi kitya bi ahanai jitya pura rajya te rasta khan tu bhal condition te thakisey. Hodai kotba nohoiley kotba bhanga rasta thakey-yatey landslide thajey, tatey landslide thakey nohoiley town laga thik majotey bi gadda thakey.
Etya tak tu rajya laga sob manu ke gadda thaka, rangkhang rasta te gari chola aro hodai din kaam nimitey aha juwa kuribole karney savdhani para gari te buhikina jabole laga adat hoijaisey. Ekta town nohoile busti laga ride lobole nimitey nohoilebi dur jaga jabole nimitey hoise koilebi, Nagaland rajya tu rasta laga subidha ekdam biya thaka laga diktar jheli asey.
Hoi, juwa olop saal te olop improvement dikhisey, khas kurikina Kohima te. Hoilebi etu saal laga pura rajya te rasta bhanga thaka laga kahani tu khas kurikina chinta koraidiya laga asey. Weather(mosom) laga pattern te ekdam dangor bodli aha logtey, rajya te etu saal laga March moina para suru hoikina achanak achanak para kiba kibi musibat khan aha dikhisey. Jitya Nagaland laga bisi bhak jaga te pathor(barf) girikina crops, ghor aro kamayi kora laga jariya ke barbad kuridisey.
Barish laga mosom ahisey aro rajya laga sob jag ate rasta bon huwa laga khobor olaisey kuntu para jibon te badha anidisey.Rajya te etu saal sobsey biya rasta dikhibole paisey.
Kunba para ekbar koisiley, “ Nagaland te amikhan logotey rasta nai.” Yatey etya tak bi bhal pani ja system nai nohoilebi pani ja laga rasta ekdam nai. Aro jitya pani girey, sobkuch ulta-pulta hoijai including traffic aro gari jam hoikina thakey. Amikhan laga rasta tu gandagi laga ekta kuwa hoijai aro sob manu nimitey ekta biya musibat hoijai
Ekta kahani asey kotey dusra desh te boha ekjun Naga manu ke ekta rangkhang rasta te gari cholabole laga experience lobole nimitey register kuribole invite kurisiley. Etu tu asurit nuhuwa laga kotha asey ki etu Naga manu para etu experience lobole mana kuridikina koisey, “Ami Nagaland te hodai din enaka rasta te travel kuribole pai thakey. Ami ghor te free para pa experience nimitey kiley poisa terabo lagey?”
Bhanga rasta tu rajya laga sob jaga te asey hoilebi Dzudza Bridge osor te thaka Dimapur-Kohima Road National Highway 29 te land-slide para affect hoikina thaka area tu etya nimitey rajya laga asol focus asey. Etu tee man jor dibole laga jarurat nai hoilebi landslide para already bhabna kora para bi bisi zinidgi ke affect kurisey.
Kun manu khan Kohima-Dimapur laga dusra rasta te travel kurisey taikhan para etu duita majotey ekta jag ate bi pungchibole kiman mushkil asey etu janey. Kunba para social media te comment kurisey ki etu rasta te aha juwa kora tu war te ja nisna asey.
Saikina tu enaka lagi asey ki etu rasta tu eman joldi thik nohobo.
Hoi kunba jaga khan asey kuntu tu landslide hobole laga asey. Hoilebi kunba jaga te landslide huwa tu manu khan laga harkat jaiseki ghas kata, construction aro khunda khundi kora nimitey asey. Etu khan tu bisi jaruri asey aro amikhan laga bhangikina thaka rasta laga mamla ke address kora homoitey etu khan ke mon te rakhibole bisi jaruri asey.
Add Comment