Patna, November 9 : Bihar Assembly para Thursday(November 9) te government job aro school, college khan te reservation tu etya thaka 60% para 75% te baraidibole laga Bill clear kurisey (etu te, Centre para economically weaker section khan nimitey jaruri banaidiya 10% reservation bi shamil asey), PTI para report kurisey.
Etu Bill te other backward classes (OBCs) nimitey 18% quota, extremely backward classes (EBCs) nimitey 25% quota, scheduled castes (SCs) nimitey 20% quota aro scheduled tribes (STs) nimitey 2% quota dibole laga nyom asey.
Etu faisla tu Bihar cabinet para ekta special meeting te reservation barabole laga proposal dikina dui din picheyte ahisey.
Etu homoitey, Bihar laga Chief Minister Nitish Kumar para koisey ki etu Bill para backward class laga manu khan laga quota baraidibo. Etu tu rajya laga population te, backward class khan laga share thaka hisap te asey kuntu toh etu tu rajya te caste survey kora picheyte result pa te dikhaisey.
Bihar government para etu saal laga October 2 te, caste survey kora laga first set release kora hisap te, backward class kuntu te other backward class (OBCs) aro extremely backward class (EBCs) shamil asey taikhan para Bihar laga 64% population banai.
Tuesday din te assembly house te dikha ekta caste survey report laga socio-economic data hisap te, Bihar laga 34% population tu gorib asey, maney taikhan laga moina laga income tu Rs 6,000 para komti asey.
Caste survey report te behes(debate) kora picheyte kotha kora homoitey Bihar laga CM Nitish Kumar para koisey ki quota baraidibole laga faisla kamyab huwa tu sob party khan para caste survey te milijulikina faisla luwa nimitey asey.
Nitish Kumar para koisey ki Bihar para sob manu laga ageyte asliyat anibole nimitey detail para kaam kurisey. 75% quota picheyte, tatey 25% free seat bi thakibo. Etu qota baraidiya para OBC aro EBC khan ke taikhan laga population logotey ekey somman agey baribole modod kuribo.
Add Comment