Imphal, February 06 : Ekta high official para Tuesday din te koisey ki bijli chor kora laga khilaf te ekta dangor crackdown kora te, police para 21 manu ke etu gairkanooni kaam te shamil thaka nimitey arrest kurisey.
Manipur State Power Distribution Company Limited (MSPDCL) laga Managing Director, H Shantikumar Singh para koisey, “Monday din te Manipur Police laga modod para 4ta valley district te mass checking kurisiley.”
Unauthorised manu khan ke gairkanooni tarika para MSPPCL Low Tension lines ke tap kora aro bijli chor kuri thaka dhurisey.
Etu raid khan tu Imphal West, Imphal East, Bishnupur aro Kakching te kurisiley.
Police ke sob doshi khan laga khilaf te FIR register kuribole request kurisey kun khan para bijli chor kurikina PSPCL ke loss koraidisey.
2003 laga Electricity Act, hisap te, bijli laga gairkanooni istamal kora tu ekta aprad asey aro etu aprad kora manu ke 3-saal tak laga jail nohoilebi fine nohoile jail aro fine duita laga bi sajai dibo parey.
Managing Director para enaka bi koisey ki bijli chor kora laga khilaf te campaign kora tu ahibole laga din tak bi continue hobo. Aro imandari para bijli chola manu khan para bijli chor kora manu khan laga ghotna ke report kurikina MSPCL ke modod kuribo lagey. Taki bijli chor kora para MSPCL laga loss huwa tu rokhabo paribo.
Add Comment