New Delhi, May 14 : Salman Khan laga ex-girlfriend Somy Ali para tailaga behalf te public ke maaf manga picheyte, Bishnoi community laga head para etu te react kurikina ekta official statement issue kurisey. All India Bishnoi community laga president, Devendra Budiya para koisey ki Bishnoi community para 1998 te jhamila suru kuridiya blackbuck(kala deer) laga case te Salman Khan ke maaf kuribole bhabna kuribo parey : hoilebi ekta condition te.
Devendra Budiya para koisey, “ Judi Salman Khan nijor para maaf mangisey koiley, Bishnoi society para etu maafi ke manibo, kilemaney golti tu Somy Ali para nohoikina Salman Khan para kora asey. Kun para bi tailaga behalf te maaf mangibo naparibo. Judi tai nijor mandir te ahikina maaf mangisey koile, amikhan laga samaj para taikey maaf kuribole bhabna kuribo parey kilemaney amikhan laga 29 rules majotey ekta rule tu maaf kuridiya asey. Salman para agey barikina ekta kosom khabo lagey ki tai para enaka golti kitya bi nukuribo. Aro junglee janwar aro environment laga raksa kuribole nimitey kaam kuribo, enaka hoisey koile hey taikhan para Salman ke maaf kuribole laga faisla te bhabna kuribo paribo.”
1999 te release huwa Sooraj Barjatya laga film Hum Saath Saath Hain laga shooting chuli thaka homoitey Salman para Jodhpur, Rajasthan osor te Mathania te thaka Bawad koikina ekta jag ate Salman para ekta kala deer laga sikar kurisiley. 1998 te Salman Khan aro tailaga co-star Tabu, Sonali Bendre aro Neelam laga khilaf te case book kurisiley. 2018 te Salman ke 5 saal laga kathin jail laga sajai bi hunaisiley hoilebi tai bail paijaisey. Hindustan Times logotey kora ekta recent interview te Somy Ali para April 14 te Salman Khan laga Mumbai te thaka ghor bahar te guli mara laga ghtna huwa picheyte, Salman nimitey chinta jataikina tailaga behalf te Bishnoi community ke maafi mangisiley.
Add Comment