New Delhi, January 11: Delhi Assembly elections hobole ageyte, BJP candidate Ramesh Bidhuri para ekta dangor dawa kurisey. Tai para koisey ki bisi AAP leaders tu jail jabole asey. Bidhuri para Congress, Mamata Banerjee aro Arvind Kejriwal ke Bangladeshi aro Rohingya khan ke rights diya laga iljam lagaikina koisey ki AAP aro Congress MLA khan tu taikhan ke fake Aadhar card diya te shamil thakisey.
Etu dawa tu fake Aadhaar card racket te investigation chuli thaka homoitey ahisey. Etu picheyte Delhi Police para AAP MLA Mohinder Goyal aro tailaga office staff ke already notice issue kuridisey. Reports hisap te, authorities khan para Bangladeshi khan ke arrest kurikina fake Aadhaar card khan dhora laga case te investigation kuri asey.
Jawab te, AAP national convenor, Arvind Kejriwal tu BJP para iljam laga opor te asurit jataisey.
AAP MP Sanjay Singh para para kuwa tu refer kurikina, Kejriwal para koisey ki BJP tu beymani tarika cholai asey, kuntu te nakli vote bana bi shamil asey.
Kejriwal para koisey, “AAP MP Sanjay Singh para revelation kora tu ekdam asurit kuridiya laga asey. BJP tu Election Commission laga laga izzat logotey khili asey.” Tai para BJP ke election process te fraud kora laga bi iljam lagaisey. Aro koisey ki BJP party leader khan tu fraud kurikina alag alag address para vote register kurithakisey. Aro etu te Union ministries te thaka member khan bi shamil asey.
Kejriwall para ageybarikina koisey ki Ramesh Bidhuri laga naam bi joldi hi BJP laga chief minister candidate nimitey announce hobo. Kejriwal para Bidhuri ke tailaga candidacy tu sahi sabit kuribole challenge kurikina, tai MP thaka homoitey Delhi laga development nimitey ki kurisey koikina hudisey. Kejriwal para hudisey, “Ami Ramesh Bidhuri ke BJP laga CM face huwa nimitey congratulate kuri asey. Hoilebi Delhi nimitey tailaga vision ki asey? Aro koisey ki Delhi laga manu khan nimitey AAP aro BJP laga CM candidates majotey ekta debate rakhibo lagey.
Add Comment