Black Fungus para 75 morishe aro 700 elaj te ase

Chandigarh: Haryana te itya dak te Black Fungus bemari para 75 manuh morikena ase aro 734 manuh neshina aro desh laga alag-alag hospitals te bemar toh elaj loi ase, koikena Tuesday din state government para khobor toh junaishe. Aro koishe ke, sob melaikena Haryana te 927 Black Fungus cases khobor thaka te sobse besi toh Gurgaon jaga te 242 cases hoikena ase, etu beche Rohtak te 214 cases aro Hisar te 211 cases ase koishe. “May 31 darik dak te, Haryana hospitals te 734 Black Fungus bemar manuh khan elaj kori ase, etu pithor te 118 manuh bemar bhal hoikena ghor te wabas jaishe, hoilebi etu samai gopal beya te 75 bemar manuh khan toh morishe koikena state government para khobor toh janaishe. Haryana te olop din akhe government medical colleges te beds toh 20 para 75 dak Black Fungus/mucormycosis bemar elag koriboli nemite othishe. State te tin(3) hafta akhe para Black Fungus cases toh besi othi-ase koishe. Haryana government para Black Fungus toh notified disease ase koikena junaikena ase aro doctors khan logot etu bemar toh district laga chief medical officer logot mandatory janai thiboli koikena ase. State government para aro etu oper te expert committee bonaikena etu bemar alaj koribo nemite Injection Amphotericin-B toh bak koriboli fesla bonaishe. State government para aro olop din akhe te 7,000 Amphotericin-B injections toh arrange koriboli kotha koikena ase. “May 31 darik dak te, government aro aided medical colleges logot 658 injections toh supply thishe aro etu oper te private medical colleges aro hospitals te bemar manuh sob ke elaj koribo nemite 500 injections thishe,” koishe. Dosura official khobor ekta te Haryana government para Covid vaccination nemite administration para 57 lakh vaccine doses toh manuh khan logot aji dak thikena ase. State government laga bapana te 1.76 crore manuh logot vaccine thibo aro etu oper te 18 para 44 umer logot 1.05 crore thibo aro baki dosura 45 para 60 umer dak logot 71 lakh thiboli janaishe. “etu nemite 3.5 crore vaccination doses toh 1.76 crore manuh logot thibo, etu pithor itya dak te 57,11,985 doses thikena ase,” koikena khobor toh janaishe.