BMW Group para koisey ki taikhna laga 3ta brand – BMW, MINI aro BMW Motorrad (dui-chaka) para January-September laga homoi te India te etya tak te sobsey bhal bikri hoisey. Etu saal laga first 9 moina te, BMW brand para 8,998 gari bikri kurisey kuntu tu ek saal agey te bikri huwa para 10% bisi asey. MINI brand laga 582 gari bikri hoisey aro etu brand laga bikri bi juwa saal laga mukabala te 10% para uthisey. Etu grou laga premium motorcycle brand BMW Motorrad para January – September laga homoitey 6,778 gari bikri kurisey. Etu tu juwa saal laga ekey homoi(January – September) laga bikri para 26% bisi asey.
BMW Group India President Vikram Pawah para Press Trust of India (PTI) ke koisey, “ Etu saal laga first halaf(January – June) laga result ola picheyte, kuntu tu amikhna laga etihas te etya tak laga best result asey, etu picheyte next 3ta quarter (July – September) laga result tu aro bisi bhal olaisey. Kilemaney amikhan para janithakisey ki amikhna para etu saal ( 2023) laga first quarter te sob nutun brand laga gari launch kuriloisey. Aro manu khan laga demand barija nimitey gari laga production baraidiya laga kaam tu etu saal laga second half (July moina) para suru hoisey. Amikhan para sobsey best quarter three result paisey.” Tai para agey barikina enaka koisey, “ Etu para dikhai asey ki tyohar laga season ahi thaka aro amikhan laga supply kora tu wapas normal te ahija nimitey amikhan laga growth tu bisi bhal hobole asey. Etu nimitey amikhna para ekdam solid growth akha kuri asey.”
2023 laga first half (January- June) te BMW Group para India te 5,867 car bikri kurikikina record paar kuridisey. Etu tu juwa saal laga first half (January –June) para 5% bisi asey. Aro BMW Motorrad brand laga under te premium motorcycle laga bikri tu 50% opor uthisey. Etu matlab tu etu brand laga under te 4,667 car bikri hoisey.
Jitya BMW Group laga Indian President Vikram Pawah ke 2023 saal tu taikhan laga juwa saal laga bikri ke paar kurikina ekta record bana laga saal hobo na nai koikina huda homoitey, Pawah para koisey, “Etu tu paaka ekta record bana laga saal hobo. Amikhan para etu saal suru kora homoitey etu akha kuri thakisey.” Tai para koisey ki taikhna laga car laga demand tu majboot hoikina asey aro supply laga situation behtar hoi asey. Aro etu tu car delivery kora laga number te bi dikhaidibo aro taikhan para etu saal khotom huwa tak te ekta solid double-digit growth dikhibole expect kuri asey.”
Add Comment