Boman Irani para direct kora ‘The Mehta Boys’, Chicago South Asian Film Festival laga opening te dikhabole asey

New Delhi, September 02 : Bollywood laga senior actor Boman Irani para Prime Videos laga ‘The Mehta Boys’ film logotey tailaga director laga journey suru kuri asey. ‘The Mehta Boys’ tu tailaga first direct kora film asey. Etu film te ‘Laila Majnu’ laga actor Avinash Tiwari bi asey. Etya Prime Videos laga Instagram page para etu film release hobole rukhi thaka fan khan logotey ekta bhal khobor share kurisey. ‘The Mehta Boys’ ke Chicago South Asian Film Festival 2024 laga Opening Film koikina dikhabole asey. Etu film te baba-chokra laga rishta te darar aha laga bari te dikhai. Etu film laga screening tu Chicago South Asian Film Festival 2024 te September 20 te hobole asey. Aro etu picheyte mashoor actor, writer, director aro producer Boman Irani, writer Alexander Dinelaris Jr, actor Avinash Tiwary aro Shreya Chaudhry, producer Danesh Irani aro executive producer Ankita Batra logotey ekta amna-samna discussion hobole asey.  Etu laga next din, September 21 te, Boman Irani aro Alexander Dinelaris Jr para ‘The Mehta Boys’ likha laga process te ekta master class lead kuribole asey. Etu film laga makers khan para etu film laga announcement tu March 2024 te kurisiley. Boman Irani para koisey ki etu film tu ekta baba-chokra laga kahani asey kun ek-dusra ke biya paikina asey aro 48-ghonta ekey logotey bitabole majbur hoijaisey. ‘The Mehta Boys’ tu ekta OTT film asey aro etu tu Amazon Prime Video te direct release hobole asey.