Bracelona vs Osasuna La Liga Match tu suru hobole 20-minutes ageyte rokhaidisey

Barcelona para Saturday din te Osasuna laga against te La Liga match khilibole thaka tu postpone hoijaisey. Match postpone huwa laga reason tu Barcelona laga first doctor team majotey ekjun doctor murija nimitey asey. Barcelona para ekta statement te enaka koisey, “Barcelona tu mondukh hoikina first team doctor, Carles Minarro Garcia, etu afternoot(Saturday din laga) murija laga  khobor announce kuriasey.” “Etu nimitey, Barcelona aro Osasuna majotey hobole thaka match tu dusra din te postpone kuridisey. Board of directors aro Barcelona laga sob staff para tailaga family aro sathi khan ke amikhan laga mon bhitor para condolences janai asey, enaka mushkil homoitey amikhan taikhan logotey asey.” Fans khan tu Barcelona aro Osasuna majotey hobole thaka La Liga match tu sabole nimitey Olympic Stadium te gusa suru hoithakisey, etu match suru hobole 20 minutes ageyte cancel kuridiya laga ageyte. Barcelona lagamidfielder Pedri para Instagram te ekta post te enaka likhisey, “Ami etya tak bi biswas kuribole naparikina asey, Carles laga family aro friend khan ke ekta dangor hug di asey.” Barcelona president Joan Laporta para koisey ki etu 53 years laga doctor, Carles Minarro Garcia tu etu duniya te tailaga maiki aro duita baccha charikina jaisey. Etu doctor tu 2017 para Barcelona laga alag alag side logotey kaam kurithakisey. Aro men’s football team logotey olop moina ageyte hey kaam kora suru hoisey. Osasuna president Luis Sabalza para koisey ki tailaga team ke etu match postpone hoija logotey eku problem nai.  Osasuna para socal media platform X(twitter) te ekta post te taikhan laga condolence janaisey.