Kohima, 12 December: Lok Sabha deh Citizenship (Amendment) Bill 2019 laga passage ke kelaaf korikena Nagaland Pradesh Youth Congress (NPYC) para Thursday din Union Home Minister, Amit Shah outside Congress Bhavan laga putla jolaise. Najolaideya agae deh All India Youth Congress (AIYC) secretary i/c Nagaland, Sarifa Rahman koise, CAB para Constitution laga preamble beya korise kelay koile etu toh religious deh based thaga nemide.
Tai koise, etu para fundamenta rights laga ekta, right to equality beya korise.
Tai koise, “Judi Government toh alak alak jaga laga manu ke rights debole hosha ke be bhabona thakile, tai khan para religion deh nohoikena humanitarian ground deh kuribole thaga ase”. CAB toh pura-puri religious basis deh ase. Etu para government toh North East region majode alak kuribole rule policy nemide kosish koriya laga ase.
Assam bechide Nagaland toh sobse wala kathara ase kelay koile Dimapur district toh illegal immigrants nemide breeding round thaga nemide. Judi CAB toh bonaise koile ahibole din pura region laga manu nemide kathara thakibole ase.
Tai koise, CAB pithor deh ami khan safe bhabona toh nai.
Tai koise, tai khan toh ami khan ke, religion laga basis deh politically aro socially alak kuribole kosish kori ase. Pura North East toh temporary political motive (gain) ke nasai kena ekta hobo lakae.
Tai para etu toh khali manu laga demak divert kuribole laga ase koikena koise, “Ami khan sob jani thakibo lakae government toh upcoming Bengal election nemide kori thaga. Hoilebe ahibole sal deh tai khan para North Wast laga tusara parts deh be enforce kuribole ase.
Tai koise, “Ami khan (Congress) toh etu hobole nadibo… Religion laga basis deh ami khan majode politically alak kuribole laga ke ami khan eku be manibole naparibo”.
Add Comment