Agencies, 23 October: Meghalaya chief minister Conrad K. Sangma para union home minister Amit Shah ke kowah toh, “Citizenship Amendment Bill (CAB) opor deh thek para kotha kuribo lakae. Conrad logode Meghalaya home minister James Sangma toh Tuesday din New Delhi deh Amit Shah logode lok kora thakishe.
Bill opor deh kelaaf korikena awas ola Cornad koise, alak alak stakeholders para bill opor deh saijabo lakae. CM Conrad toh CAB opor deh mela issue deh kotha kuribo nemide Hon’ble Home Minister Amit Shah ke lok kora laga ase.
Khobor hisaab deh, Shah para stakeholders logode kotha kuribole monja janaishe aro etu opor deh centre logode melibo karni state government para steps suru kuribole koise.
Amit Shah toh ruling BJP laga national president be hoi. Tai para khobor janaideya toh, Centre deh NDA government para National Register of Citizens (NRC) agae deh CAB toh anibole ase.
Bill para Bangladesh, Pakistan aro Afghanistan laga Hindus, Sikhs, Buddhists, Parsis, Christians aro Jains ke Indian citizenship pabole ase. Etu toh kon December 31, 2014 tak India deh kushise etu khan ke pabole ase.
CAB toh Lok Sabha deh passed kora thakishe aro Rajya Sabha deh etu bill toh agae jabole napara thakishe. Etu toh besi NDA allies ke NPP aro tusara organisations khan melikena protest kora nemide agae jabole napara thakishe. Hoilebe BJP para etu bill toh aro joldi Parliament deh passed kuribole wada korise.
September 20 direk Silchar deh meeting lowah time deh BJP’s national general secretary Ram Madhav koise, “Ami khan para Jammu and Kashmir laga manu khan nemide Article 370 toh hatai deshe aro etiya ami khan para apuni khan sob nemide Citizenship (Amendment) Bill toh joldi passed kuribole ase”.
Amit Shah para Meghalaya government ke etu issue nemide toh leki kena agae ahibole koise.
Conrad toh National People’s Party (NPP) laga national president ase. Tai para be Amit Shah logode Sixth Schedule laga amending issue opor deh kotha koise.
Add Comment