Raipur, November 2 : Chattisgarh laga Chief Minister Bhupesh Baghel para Thursday din te koisey ki BJP khan para rajya te poisa aro alag bustu khan anikina assembly election laga ageyte vote diya manu khan laga dimag bodli kuribole nimitey CRPF laga gari khan ke cholai asey. Tai para Election Commission (ECI) ke sipahi khan laga gari khan bi check kuribole request kurisey.
Baghel para reporter khan ke koisey, “Ami para Election Commission ke request kuri asey ki taikhan para CRPF laga gari khan ke bi check kuribo lagey. BJP para etu rajya te taikhan haribole asey koikina manisey. Aro akhri kosis te, BJP para taikhan laga box tu poisa para bhorta kuri asey kuntu ke taikhan para vote dibole thaka manu khan ke taikhan laga side te tanibole nimitey cholabole asey. Etu tu ekta serious mamla asey. Congress para etu mamla te ekta complaint file kuribole asey. Rajya te kafi CRPF thaki thakikina aro bisi CRPF anibole ki jarurat asey ?”
Tai para koisey ki Chhattisgarh te already CRPF laga bisi troops aro units asey aro rajya te CRPF laga aro bisi unit anibole ki dorkar asey etu hudisey. Etu mamla tu chinta kuridiya laga asey koikina, Baghel para koisey ki tai para etu mamla te ekta complaint file kuribole asey.
Baghel para agey te bi jati, dhorom hisap te manu khan ke bhag kora aro dhorom bodli kora laga mamla te BJP ke gusa dikhaisiley. Bastar jaga te jama huwa manu khan ke address kora homoitey, Baghel para koisey, “BJP logotey khali duita topic hey asey, manu khan ke dhorom, jaga, jati laga hisap te bhak kora aro dhorom bodli kora laga topic. Taikhan para duita community laga kokai bhai khan ke ekjun ekjun logotey jhagra kuribole diye Taikhan para eku kaam nukuribo hoilebi manu khan ke jhagra kuribole dibo aro vote jama kuribo. Taikhan laga dimag te ghing lagiya aro larayi jhagra kora chuli thakey.”
Congress para agey te Election Commisison of India (ECI) ke Assam laga Chief Minister Himanta Biswa Sarma para Chhattisgarh te rally chuli thaka homoitey tai para bayan diya laga against te action lobole koikina ekta memorandum submit kurisey.
Assam CM Himanta Biswa Sarma para Chhattisgarh te election laga campaign kora homoitey Congress laga sarkar ke hamla kurikina enaka koisey, “ Ekta jag ate ekjun Akbar ahey aro tai para aro 100 Akbar ke matey. Etu napahoribi aro Akbar ke kiman joldi parey eman joldi pathaidibole kosis kuribi nohoile ama Kaushalya laga mati tu letra hoijabo.”
Chhattisgarh laga 90-member state assembly election tu November 7 aro 17 te duita phase te hobole asey aro vote laga counting tu December 3 te hobole asey. Vote diya laga tarik announce kora picheyte Model Code of Conduct(election tu safa safi aro hosa hosi hobole dibole laga nyom kanoon khan) lagu hobo.
Add Comment