Mumbai, January 24: Vicky Kaushal laga nutun etihasik action film kuntu Maratha raja Chhatrapati Sambhaji Maharaj laga jibon te adharit asey, etu film tu aha moina te release hobole ageyte ekta musibat te fasisey. Etu film laga trailer tu etu hapta te release hoisiley. Aro etu trailer laga ekta scene opor te ekta Maratha group para objection uthaisey. Maratha organization Sambhaji Brigade para Vicky Kaushal aro Rashmika Mandanna laga dance kora part ke object kurisey. Etu duijun tu etu film te Chhatrapati Sambhaji Maharaj aro Maharani Yesubai laga kirdar nibhai asey.
Sambhaji Brigade para etu film para etu scene ke hataidibole demand kurikina koisey ki taikhan khusi asey ki Sambhaji Maharaj laga opor te ekta Hindi film banaisey. Hoilebi etu dance laga through para Sambhaji Maharaj insult hoi asey aro etu ke hataidibo lagey.
Vicky aro Rashmika laga alava, etu film te Akshaye Khanna bi asey kun Mughal Emperor Aurangzeb laga kirdar nibhai asey. Taikhan laga alava, Vineet Kumar Singh, Ashutosh Rana, Divya Dutta, Neil Bhupalam, Santosh Juvekar aro Pradeep Rawat ke bi important role te dikhibole asey.
Etu film te etu bahadur Maratha raja para poila jamana te raaj kora laga bari te dikhabole asey, 1681 te taikey raja ghosit kora picheyte. Olop din agyete, Chhaava laga makers khan para social media te etu film laga main cast laga nutun poster release kurikina fan khan majotey excitement baraidisey.
Add Comment