China coal mine te manuh mora 23 hoishe

December 6, 2020. Southwest China te coal mine pithor te carbon monoxide leak hoikena manuh mora toh 23 te othikena ase aro etu oper te 1 jun manuh ke pachaishe, koikena Sunday din te officials para janaishe. Etu incident toh Yongchuan district of Chongqing Municipality osor Diaoshuidong colliery te 5 pm (local time) Friday din te howa thakishe. Manuh mora toh 24 jun coal mine pithor te pasikena thakai khan ase. Coal mine pithor te carbon monoxide gas besi thaka nemite morishe. Etu mine toh tui(2) agae para bondh hoikena thaka ase koishe. Etu accident toh keneka hoishe investigate koria ase, koikena Sunday din state-run Xinhua news agency para khobor toh dishe. Diaoshuidong coal mine toh 1975 saal te bona ase aro 1998 saal te private khan para jola soruh korishe, etu jaga te hotai saal coal toh 120,000 tonnes neshina olai thaki koikena local emergency management department para koishe. March 2013 saal te mine te toh hydrogen sulfide poisoning hoikena 3 jun manuh morishe aro 2 jun jokom paishe. Hoshari kam kora nemite coal mines te manuh mora eman nai, hoilebi China te minning accidents toh hoi thaki aro duniyaa te China toh sobse tangor coal ola jaga ase koishe. September moina te Chongqing, Songzao coal mine te carbon monoxide gas te miners khan ke pasikena 16 manuh morishe. Duniyaa pithor te China toh sobse tangor coal ola jaga aro chowa desh be ase koishe. 2020 saal te mining accidents te 100 oper manuh mora khobor paikena ase. China te Coal ola toh tai khan target pongchibo nemite November aro February moina te kam kori thaki koishe.