Shenzhen, China, 20 November : India laga mixed doubles duo B Sumeeth Reddy aru N Sikki Reddy, Tuesday din ongoing China Masters badminton tournament laga opening round match te jeet pailese.
World number 32 rank thaka mixed doubles pair to ek ghonta upor American duo Presley Smith aru Jennie Gai, junhan world badminton ranking te 145th ase, 23-21, 17-21, 21-17 points te harai dise, Olympics.com hisap te. Indian duo agor round 16 te China laga world number two-ranked duo Feng Yan Zhe aru Huang Dong Ping opor kheli bo, junhan top seeds bhi ase. Ping Paris Olympics te mixed doubles gold medal jitise Wang Yilyu logot partner hisap te.
Dusra Indian players te Priyanshu Rajawat men’s singles event te Indonesia laga Chico Aura Dwi Wardoyo opor 24-22, 13-21, 18-21 points te hari dise aru tournament pora bahar hoi jase.
Rajawat first game te lead pai thakise, kintu next duta games te momentum maintain koribo naparise, sopse last game te ekta brief time karne 4 points lead korise.
Women’s singles laga taraf pora 46th-ranked Aakarshi Kashyap Japan laga world No. 14 Tomoka Miyazaki opor 21-10, 21-18 points te hari dise.
Anupama Upadhyaya later din USA laga Beiwen Zhang logot khelibo.
Indian top-ranked men’s doubles pair Chirag Shetty aru Satwiksairaj Rankireddy bhi action te jabole ase. Tai khan Paris Olympics 2024 piche for the first time khelibo, junte medal na paise.
PV Sindhu, Malvika Bansod, Lakshya Sen aru Treesa Jolly/Gayatri Gopichand bhi Wednesday din Shenzhen te kheli jabole ase.
Add Comment