China Open: Satwik-Chirag World No.6 Pair Duijun Quarter-Finals Bonjise

Agencies: Thursday te India laga top men’s doubles pair Satwiksairaj Rankireddy aro Chirag Shetty duijun pora japan laga world No.6 Hiroyuki Endo-Yuta Watanabe duijun ke three-games te chiti kena quarter-finals bonja pora India ke China Open te etya tak chalu rakhi ase.

Satwik-Chirag pora  Japanese pair ke 21-18, 21-23, 21-11 pora Round 16 laga ek ghonda-adha laga match te harai dise.

Endo-Watanabe ke etu toh Indian duijun pora harai diya duibar wala ase, etu laga ake te Satwik-Chirag gujun pora Japan pair ke French Open te jowa mohina harai di kena ase.

Satwik-Chirag duijun etu sal odhi kena ahi dhakise aro taijun duniya laga top men’s doubles pairs ke bar bar harai di kena ahi ase. Jowa mohina te taijun French Open final te bonjise, aro taijun world No.1s Marcus Fernaldi Gideon-Kevin Sanjaya Sukamuljo logot te harise.

Satwik-Chirag duijun hotai attack-minded pair dhakise hoile bhi etu sal taijun game te bishi developed hoi kena taijun laga khal te bhi kiba nuton dhali ase.

Chirag aro Satwik duijun pora bhi taijun laga all-court play botli hoi jaise, Chirag pora  net ke saa somoy te Satwik pora court biche te dhaki kea smash kuribo.

China Open te Indian majo te bachi kena dakiya toh Satwik-Chirag duijun ekla ase, singles challenge  te olap ake te Parupalli Kashyap aro B Sai Praneeth duijun bhi hari jaise.

Kashyap pora Denmark laga seventh seed Viktor Axelsen logot 13-21, 19-21 pora harise aro Praneeth bhi Dane logot te 20-22, 22-20, 16-21 pora harise.

Thursday te bhi, Satwiksairaj Rankireddy aro Ashwini Ponappa duijun bhi taijin laga  mixed-doubles quarter-final clash te South Korean pair YuJung Chae aro Seung Jae Seo logot 21-23, 16-21 pora harise jaise.

India laga women’s singles challenge bhi khotam hoise PV Sindhu aro Saina Nehwal duijun pora bhi first round matches te hariya biche te.

Sindhu toh Chinese Taipei laga world No.42 Pai Yu Po logot  13-21, 21-18, 19-21 pora harise aro  Saina  toh world No.22 Yan Yan Cai logot 9-21, 12-21 pora hari kena olai haise. HS Prannoy bhi  17-21, 18-21 pora  Denmark’s Rasmus Gemke logot tai laga  opening round contest te hari kena olaijaise.