China para Arunachal Pradesh laga aro 30 jaga laga naam bodli

Itanagar, April 1 : China para India laga state Arunachal Pradesh laga Zangnan region te  30 jaga laga naam laga aro ekta list issue kurisey.

Etu harkat para China  para Arunachal Pradesh laga opor te haak jata laga mamla te India aro Arunachal majotey jhamila chuli thaka tu barai asey. 

Chinese state media laga hisap te, India laga ministry of civil affairs para Arunachal Pradesh laga 30 jaga laga “standardized geographical names” laga fourth list olaisey, kuntu ke taikhan para ‘Zangnan’ koikina recognize kuri asey. 

Chinese para release kora list te 30 jaga laga naam asey kuntu ke Arunachal Pradesh te public khan para cholai asey. 

China para April 2023 te Arunachal Pradesh laga 11 jaga laga naam bodli kurisiley. Chinese characters, Tibetan aro pinyin cholaikina. Etu tu third list thakisey.

First list tu 2017 te issue kurisiley, kuntu picheyte 2021 te second list issue kurisey. 

China para Arunachal Pradesh ke Zangnan koikina koi. Aro etu jaga tu taikhan laga desh laga ekta jaruri hisa asey koikina dawa kurisey. 

Taikhan laga hisap te, India para Arunachal Pradesh ke gairkanooni tarika para banaisey.

Etu mamla tu China para Prime Minister Narendra Modi Arunachal Pradehs te Sela Tunnel ke inaugurate kuribole nimitey aha laga khilaf te protest kora picheyte olaisey. 

India para lagatar koi asey ki Arunachal Pradesh tu India para kitya bi alag hobole napariya laga hisa asey. 

China khan para enaka harkat kora laga jawab te, ministry of external affairs (MEA) laga spokesperson Randhir Jaiswal para koisey, “Arunachal Pradesh ke loikina amikhan laga stance tu crystal clear asey aro amikhan para etu ke bar bar dohrai asey. China para misa misi haak jamai thaka para amikhan laga position ke bodli kuribole nohoi.”