China te Brazilian mongso te Coronavirus paishe

Beijing: November 13, 2020. Friday din te Chinese city Wuhan te novel coronavirus toh Brazilian laga mongso packet te paishe koishe. Etu hafta pura desh sob te testing kora samai thurishe koishe.  Etu mongso toh desh te August 7 darik Qingdao port te ahishe aro Wuhan te August 17 darik te pongchise aro etu cold storage facility te raki thakishe koishe. Novel coronavirus toh first central Chinese city laga bazaar te jaa saal olaishe aro duniyaa sob te phile-kena jaishe. Mongso packet anai laga registration code toh 2015, ase koikena commission para janaishe, aro etu laga malik toh Marfrig Global Foods S.A, thakishe. Etu khobor toh Reuters para koishe. Etu samai Marfrig logot khobor loboli parai nai. Wuhan facility te 100 staff oper khan logot test loishe aro 200 environmental samples othaikena ase koishe. Etu saal virus pheli thaka rokabo nemite hoshari kam tangor kora bechete, June moina para China te bahar desh para aha khana te virus saboli kam koriase. September moina dak te 3 million pithor te 22 positive samples kali paishe, hoilebi paani jahas te kam kora manuh khan logot virus bemar toh paishe. Etu nemite etu hafta bahar para khana aha te testing kora soru hoishe.  Hafta pithor te he aro Chinese authorities para Argentinian laga mongso packet te coronavirus paishe. Aro Shandong chaka te dosura bahar para mongso aha te sample toh positive thakishe, koikena Friday din province para janaishe. Duniyaa te China toh guru mongso kenai te sobse tangor desh ase, etu Brazil aro Argentina sobse tangor suppliers ase koishe.