Chumoukedima Tey Jui Jula Para Saata Ghor Khan Juali Kena Khotom Kuri Dishey

May 26, 2024 : Chumoukedima laga Model Village tey, jui julishey, 8:15 pm raati phaney,aru itu jui laga para saata ghor khan ke jui para julai kena khotom kuri dishey, itu jui para aru jui jula para property khan 10 lakh poisa laga damage kuri dishey. Eku casualty khan toh hoiley report hoa nai koishey, aru itu jui keneka lagishey itu janiboley aru bhi baki asey. Teenta fire brigade, duita toh Chumoukedima Fire Station aru ekta toh Dimapur Central Fire Station para jai ken aitu jui toh bhujaishey koi asey. Ghor malik ekjon ke huda homoi tey, tai para koishey 8:30 nishina tey fire brigade ahishey koishey, tai para koishey itu jui laga homoi tey tai khan eku document khan aru saman khan ulaboley para nai koishey. Aru bhitor tey teenta gas cylinder thaka tey, duita toh ulaboley parishey aru ekta toh phuti jaishey koishey. Aru ekjon tatey thaka man uke huda time tey, tai para koishey, ki, jui toh achanak para dangor laga dikhi paishey, aru tai para pani khan mari lebi bujhaboley paranai koishey, aru tai phat para tai khan laga cylinder toh ulai dishey aru tai laga scooty bhi bahar durr tey rakhidishey koishey. Aru thik tai para tai laga gari toh durr tey rakhi kena wapas ahi kena tai laga ghor bhitor tey jui bishi lagi kena tai aru eku saman khan ulaboley napara hoi jaishey koishey.