January 8 (IANS): BJP laga allies, Congress aro Left parties logote milai kena besi northeastern parties khan pora besi jor pora Citizenship (Amendment) Bill, 2016 logote khilaf khota korise aro koise ki “etu Bill toh Indian constitution laga poila khota logote khilaf ase.”
Congress, Communist Party of India-Marxist (CPI-M) pora lead kora Left parties logote Bharatiya Janata Party laga partner, Tripura laga Indigenous People’s Front of Tripur (IPFT) aro Meghalaya laga National People’s Party (NPP) pora bi Citizenship (Amendment) Bill logote khilaf othise aro etu Bill hataibole karne demand korise.
IPFT Assistant General Secretary Mangal Debbarma pora IANS ke koise ki, northeastern region aro alaag states pora chottu parties khan ekki logote ahiya, National Federation for New States (NFNS), pora bietu Bill logote khilaf ase
Debbarma pora koise, “Moi khan pora etu laga khota tohGuwahati city te jowala NEDA (North East Democratic Alliance) laga meeting te bi koise. Mizoram laga ruling party Mizo National Front (MNF) milakena NEDA laga besi party khan Citizenship (Amendment) Bill logote khilaf ase.”
Assam laga besi powerful minister Himanta Biswa Sarma to etu anti-Congress alliance — NEDA laga convener ase.
Ekdum jeena jana Young Mizo Association aro People’s Representation for Identity and Status of Mizoram (PRISM) nisina political parties milai kena sob Mizoram laga NGOs khan bi etu logote khilaf ase. Tai khan koise ki etu Bill pora besi northeastern khan laga chakka toh biya finay bodli kori dibo.
Aizawl te Mizo Student Federation President L. Ramdinliana Renthlei pora media ke koise ki tai khan toh government ke etu notun citizenship law toh Mizoram te ahibole nadibo.
Nagaland Tribes Council (NTC) bi etu Bill logote khilaf ase.
Tripura laga sob pora purana party INPT (Indigenous Nationalist Party of Tripura) pora national highway aro state te thakiya ekta rail line toh jowa mohoina etu Bill hatai dibo karne demand kori kena block korise.
INPT General Secretary Jagadish Debbarma pora koise ki etu Bill hatadibo karne khota toh Tripura aro Delhi te bi dangor koridibo.
Besi dagot thakiya sathta Northeastern states laga aathta students aro youth organizations laga umbrella body, North East Students Organisation (NESO), pora Tuesday te pura northeast te 11-hour bandh koribole madise. Etu toh diktari Bill BJP-led NDA government pora lagai dibole laga maksat ke khilaf kora laga ase.
Bill ke support kora BJP laga veteran tribal leader Rampada Jamatia pora IANS ke kois: “Citizenship Bill ke halibo laga phabana te northeastern region parties khan laga phabana aro monduk ke bi sabo laage.”
Bharatiya Janata Party MP Rajendra Agrawal pora head kori kena Joint Parliamentary Committee (JPC), Citizenship (Amendment) Bill, 2016 laga report toh Lok Sabha te dibole ase.
Tuesday te Lok Sabha laga winter session toh khodom hobole ase aro etu toh najane ki etu Bill laga khota toh etu session te koribo na nai.
Etiya laga winter session toh Lok Sabha election laga aage te last full-fledged Parliament session hobo.
Lok Sabha laga CPI-M Chief Whip Jitendra Chowdhury pora IANS ke Delhi pora phone te koise “Left Parties, Congress aro besi alaag parties khan toh etu Bill ke khilaf thakibo. Constitution te dharam hisab pora citizenship dibo karne ekko likha nai. Foreigners khan ke hisab kori kena saabole laga cut off date toh 1971 Indira-Mujib pact ase.”
Tai pora koise ki BJP khan ahibo laga Lok Sabha polls te laab pabo nimi te etu Bill toh Parliament jolti dibo mon ase.
Bill toh Lok Sabha te 2016 te poila banaisearo etu laga maksat toh Pakistan, Afghanistan aro Bangladesh pora India bola Hindus, Sikhs, Buddhists, Jains, Parsis aro Christians khan kaskoz dhik nathakilebi nahoile kakos expire hoijai kena thakilebi ‘naturalisation’ laga process pora Indian citizenship pabo.
BJP MP Rajendra Agrawal pora loikean 30-member joint parliamentary panel toh study visits korikena Gujarat, Rajasthan, Assam aro Meghalaya laga besi manu khan logote logpaise. Tai khan besi organizations, experts aro manu khan laga mon phabana bi honise.
Committee pora Assam, Bihar, Gujarat, Jharkhand, Maharashtra aro West Bengal laga chief secretaries aro police chiefs khan laga phabana bi besi honise.
The Citizenship Act of 1955 pora Indian citizenship pabo nimi besi rasta dise— notun jonam, purana jonam(descent), registration, naturalisation aro India logote madi milai kena.
CPI-M laga Tripura state Secretary Gautam Das, Congress Vice-President Tapas Dey aro alaag political parties laga leaders khan laga phabana ase ki juti NDA pora jobojost etu Bill toh Parliament te pass korile Northeast te besi dangor chamela olaibo.
Etu leaders khan laga hisab te etu Bill toh Indian constitution laga poila khota logote khilaf ase.
NESO Secretary General Sinam Prakash Singh, aro Chairman Samuel Jyrwa pora joint statement te koise: “Central government laga etu maksat toh indigenous manu khan laga mon phabana logote hisab nakuri kena joborjost kora laga ase. Aro central government pora kora etu kam toh besi khatarnak ase aro etu pora seven states laga asol indigenous manu khan toh minority hoijabo.”
Statement te etu bi koise “NESO pora Union government ke northeastern region laga vote bank politics nimi te indigenous manu khan laga future logote nakhelibi koikena janai dise.”
Add Comment