Dimapur, 04 September: Chief Minister Nagaland, Neiphiu Rio, Dy.Chief Minister, Y.Patton, Chief Secretary Nagaland Temjen Toy aro tusara senior Government officers chairmen aro Dimapur Sardar of wards/ villages laga GBs aro tusara tusara neighbouring bosti khan logode meeting loise. Etu meeting toh 4th September 2019 DC Dimapur laga conference Hall deh loise. Meeting deh National Register of Citizens (NRC) aro Inner Line Permit(ILP) laga implementation opor deh kotha korise.
Meeting deh Rio para Dimapur toh horu India ase aro Nagaland alga commercial hub ase koise. Dimapur toh phal jaga bonabo nemide Government ekala para motob debole napari. Etu para etu toh peoples’ movement hobo laki koise. Tai para RIIN toh aro olob samai lowah thakibo pari koise kelay koile aro besi exercise deh saijabole thaga nemide. Hoilebe tai bhabona kora toh, Dimapur deh dekthari napabo nemide ILP toh suru kuribo laki.
Dimapur toh criminals laga city hoise koikena tai koise, pahar state laga manu khan Dimapur deh thaki jabole nemide sai ase. Etu khan sob nemide tai para grassroot leader khan para motob kori thakibole koise. Rio para GBs toh Government laga representatives ase koise. Tai para tai khan ke Nagaland phal hobo nemide phal para mon dekana kaam kori thakibole koise.
Rio koise, ILP implementation toh grassroot leaders opor deh ase aro tai para nejor laga wards deh illegal immigrants toh thek para janibole koise. Rio para be illegal immigrant khan nahaibo nemide district administration aro police machinery para ILPchecking gara thakibole koise.
Citizen Amendment Bill opor deh Rio koise, CAB 2016 toh Parliament deh suru kora thakishe aro 8th January 2019 Lok Sabha deh passed kora thakishe. Tai koise, CAB passed korise koile be Naga society deh dekthari napabo. Kelay koile Nagas toh Article 371(A) pithor deh bachai kena thaga nemide. Etu toh 16th Point Agreement para ahha laga ase. Tai para Nagas khan ekta awas logode unity para kotha kuribole koise.
Deputy Chief Minister, Y.Patton para tai laga address deh bhabona kora toh, RIIN, ILP aro NRC deh mela issur toh monchida korikena lobo laki. Khobor janaideya toh, 31st August 2019 deh Assam deh National Register of Citizens final list publish kora deh 19 lakh opor manu khan tai khan laga naam powah nai.
Patton koise, Dimapur Sardar aro neighbouring areas para Assam logode border shar kori. Etu para Dimapur district administration aro Police logode Nagaland state deh tusara khan nakushibo nemide saijabole koise.
Gara ILP checking aro illegal immigrants khan nahaibo nemide Patton bhabona kora toh, grassroots level deh leaders khan ektum gara para saijabo laki.
Tai koise, ami khan sob ami khan laga part toh kuribo laki kelay koile ami khan laga state deh illegal immigrant khan nahaibo nemide.Tai para be sob wars aro village council laga Chairmen aro GBs para besi saijabo laki kelay koile tai laga jurisdiction pathor deh hosha laga residents thaga toh phal para jana nemide. Patton koise, pahar state para ahha khan jani paise koile district administration laga concerned officials aro Police logode joldi janaidebo laki kelay koile thek action toh lobo nemide.
Minister PHED, Jacob Zhimomi para village GBs aro Chairman khan ekta hoi kena thakibole aro illegal immigrants laga issue toh thek hobo nemide kaam kuribole samjaise. Tai para be tai khan ke jaat koraise Naga tradition hisaab deh tai khan toh law makers ase koi kena. Tai khan ke nejor laga wards/ villages pithor deh kaam toh ektum mondekana kuribole koise.
Alak alak wards / villages laga GBs/Chirmen para Government deh Neiphiu Rio para head kora ke thanks janaishe kelay koile Dimapur deh tai khan monchina howah toh dekhai kena meeting lowah nemide. Meeting deh Chief Secretary Nagaland ,Temjen Toy chair thakishe.
Add Comment